¹ Змий же бе мудрейший всех зверей сущих на земли, ихже сотвори Господь Бог. И рече змий жене: что яко рече Бог: да не ясте от всякаго древа райскаго? ² И рече жена змию: от всякаго древа райскаго ясти будем: ³ от плода же древа, еже есть посреде рая, рече Бог, да не ясте от него, ниже прикоснетеся ему, да не умрете. ⁴ И рече змий жене: не смертию умрете: ⁵ ведяше бо Бог, яко в оньже аще день снесте от него, отверзутся очи ваши, и будете яко бози, ведяще доброе и лукавое. ⁶ И виде жена, яко добро древо в снедь и яко угодно очима видети и красно есть, еже разумети: и вземши от плода его яде, и даде мужу своему с собою, и ядоста. ⁷ И отверзошася очи обема, и разумеша, яко нази беша: и сшиста листвие смоковное, и сотвориста себе препоясания. ⁸ И услышаста глас Господа Бога ходяща в раи по полудни: и скрыстася адам же и жена его от лица Господа Бога посреде древа райскаго. ⁹ И призва Господь Бог адама и рече ему: адаме, где еси? ¹⁰ И рече ему: глас слышах тебе ходяща в раи, и убояхся, яко наг есмь, и скрыхся. ¹¹ И рече ему Бог: кто возвести тебе, яко наг еси, аще не бы от древа, егоже заповедах тебе сего единаго не ясти, от него ял еси? ¹² И рече адам: жена, юже дал еси со мною, та ми даде от древа, и ядох. ¹³ И рече Господь Бог жене: что сие сотворила еси? И рече жена: змий прельсти мя, и ядох. ¹⁴ И рече Господь Бог змию: яко сотворил еси сие, проклят ты от всех скотов и от всех зверей земных: на персех твоих и чреве ходити будеши, и землю снеси вся дни живота твоего: ¹⁵ И вражду положу между тобою и между женою, и между семенем твоим и между семенем тоя: той твою блюсти будет главу, и ты блюсти будеши его пяту. ¹⁶ И жене рече: умножая умножу печали твоя и воздыхания твоя: в болезнех родиши чада, и к мужу твоему обращение твое, и той тобою обладати будет. ¹⁷ И адаму рече: яко послушал еси гласа жены твоея и ял еси от древа, егоже заповедах тебе сего единаго не ясти, от него ял еси: проклята земля в делех твоих, в печалех снеси тую вся дни живота твоего: ¹⁸ терния и волчцы возрастит тебе, и снеси траву селную: ¹⁹ в поте лица твоего снеси хлеб твой, дондеже возвратишися в землю, от неяже взят еси: яко земля еси, и в землю отидеши. ²⁰ И нарече адам имя жене своей жизнь, яко та мати всех живущих. ²¹ И сотвори Господь Бог адаму и жене его ризы кожаны, и облече их. ²² И рече Бог: се, адам бысть яко един от нас, еже разумети доброе и лукавое: и ныне да не когда прострет руку свою и возмет от древа жизни и снест, и жив будет во век. ²³ И изгна его Господь Бог из рая сладости делати землю, от неяже взят бысть. ²⁴ И изрину адама, и всели его прямо рая сладости: и пристави херувима, и пламенное оружие обращаемое, хранити путь древа жизни.