¹ Во днех онех разболеся езекиа (царь) да смерти. И вниде к нему исаиа пророк сын амосов и рече к нему: тако глаголет Господь: заповеждь дому твоему, умреши бо ты и не будеши жив. ² И обрати езекиа лице свое ко стене и помолися ко Господу, глаголя: ³ Господи помяни ныне, яко истиною ходих пред тобою и сердцем совершенным, и угодная пред очима твоима сотворих. И плакася езекиа плачем великим. ⁴ И бяше исаиа еще посреде двора, и бысть слово Господне к нему, глаголя: ⁵ возвратися и рцы езекии вожду людий моих: тако глаголет Господь Бог давида отца твоего: услышах молитву твою и видех слезы твоя: се, аз изцелю тя, и в день третий взыдеши в дом Господень: ⁶ и приложу к летом твоим лет пятьнадесять, и от руки царя ассирийска избавлю тя и град сей, и защищу град сей мене ради и давида ради раба моего. ⁷ И рече исаиа: да возмут перевясло смоквей и да положат на вред, и изцелеет. ⁸ И рече езекиа ко исаии: кое знамение, яко изцелит мя Господь и взыду в дом Господень в день третий? ⁹ И рече исаиа: сие знамение от Господа, яко сотворит Господь слово, еже глагола: (хощеши ли да) пойдет стень десять степений, или возвратится десять степений? ¹⁰ И рече езекиа: удобно стени уклонитися десять степений: ни, но да возвратится стень на десять степений вспять. ¹¹ И возопи исаиа пророк ко Господу, и возвратися стень по числу назад десять степений. ¹² Во время оно посла мародах валадан, сын валаданов, царь вавилонский, книги и дары ко езекии: слыша бо, яко разболеся (царь) езекиа. ¹³ И порадовася езекиа о них, и показа им весь дом свой сокровищный, сребро и злато, и ароматы и елей добрый, и дом сосудов и елика обретошася в сокровищих его: и не бе места, егоже не показа им езекиа в дому своем и во всей области своей. ¹⁴ И вниде исаиа пророк ко езекии царю и рече к нему: что глаголаша мужие сии, и откуду приидоша к тебе? и рече езекиа: от земли дальния приидоша ко мне, от вавилона. ¹⁵ И рече: что видеша в дому твоем? и рече езекиа: вся, елика в дому моем, видеша: несть в дому моем, егоже им не показах, но и яже в сокровищих моих (видеша). ¹⁶ И рече исаиа ко езекии: слыши слово Господне: ¹⁷ се, дние грядут, рече Господь, взята будут вся, яже в дому твоем, и вся, яже собраша отцы твои до дне сего, внидут в вавилон: и не останется слово, еже рече Господь. ¹⁸ И сынове твои, иже изыдут из тебе, ихже родиши, возмутся и будут скопцы в дому царя вавилонскаго. ¹⁹ И рече езекиа ко исаии: благо слово Господне еже глагола: да будут мир во дни моя. ²⁰ И прочая словес езекиевых, и вся сила его, и елика сотвори, источник и водотечь, и введе воду во град, не се ли, сия написана в книзе словес дний царей иудиных? ²¹ И успе езекиа со отцы своими, и погребен бысть во граде давидове. И воцарися манассиа сын его вместо его.