¹ И введе мя во храм, и размери аилам, шести лактей широта о сию страну и шести лактей широта аилам об ону, ² и широта врат десять лактей, и бока врат пяти лактей о сию страну и пяти об ону: и измери долготу их четыредесять лактей, а широту двадесять лактей. ³ И вниде во двор внутренний, и размери аилам дверий двух лактей, и двери шести лактей, бока же дверная седми лактей о сию страну и седми об ону. ⁴ И размери долготу дверий четыредесять лактей, а широту двадесять лактей пред лицем храма, и рече ко мне: сие святое святых. ⁵ И размери стену храма шести лактей и широту страны четырех лактей окрест, ⁶ страны же страна до страны тридесять и три дващи: и разстояние в стене храма во странах окрест, еже на прозрак быти входящым, да отнюд не прикасаются ко стенам храма. ⁷ Широта же вышния страны по приложению от стены к вышней окрест храма, яко да разширяется свыше, и да от долних восходят на горняя, а от средних на трекровная. ⁸ И видех храма высоту окрест разстояние стран равно трости шести лактей разстояния, ⁹ широта же стены страны внеуду пяти лактей, и прочая между странами храма, ¹⁰ и между преградами широта двадесяти лактей, окружность окрест храма. ¹¹ Двери же преград ко прочему дверий единых яже к северу: и дверь едина к югу, широта же света прочаго пяти лактей широта окрест. ¹² Раздел же противу прочему аки к морю седмьдесят лактей, широта стены разделяющия, широта окрест пять лактей, и долгота ея девятьдесят лактей. ¹³ И размери противу храма долготу сто лактей, и прочая и разделяющая, и стены их в долготу сто лактей. ¹⁴ И широта противу храма, и прочая противу ста лактей. ¹⁵ И размери долготу разделу противу лицу прочему созади храму тому, и прочая о сию страну и об ону ста лактей долготу: храм же и углы, и елам внешний, доски постланы. ¹⁶ И окна решетчатая свещения окрест трием (странам) еже приницати: храм же и яже близ его устлана древом окрест, и помост, и от помоста до окон: окна же отворяема трояко на приницание, ¹⁷ и даже до дому внутренняго и до внешняго, и на всей стене окрест внутренней и внешней меры, ¹⁸ и изваяннии херувими и финики: финик посреде херувима и херувима: два лица херувиму: ¹⁹ лице человеческо к финику сюду и сюду, и лице львово к финику сюду и сюду, изваян весь храм окрест. ²⁰ От помоста даже до свода херувими и финики изваяни. ²¹ святое же и храм отверзаемь на четыри страны, пред лицем святых видение яко зрак требника древяна, ²² три лакти высота его, а долгота дву лактей, и широта такожде: имеяше же роги, и основание его и стены его древяны. И рече ко мне: сия трапеза, яже пред лицем Господним: ²³ двои же двери храму и двои двери святому, ²⁴ двоим дверем вращающымся: две вереи единым, и две вереи вторым дверем. ²⁵ И ваяния над ними и над дверьми храма херувим и финики, по ваянию святых, и древеса потребна пред лицем елама от внеуду, ²⁶ и окна сокровена. И размери сюду и сюду в покровех елама, и страны храма древами сопряжены.