¹ Сие видение подобие славы Господни. И видех, и падох ниц, и слышах глас глаголющаго, и рече ко мне: сыне человечь, стани на ноги твоя, и возглаголю тебе. ² И прииде на мя дух, и взя мя, и воздвиже мя, и постави мя на ногах моих, и слышах его глаголюща ко мне. ³ И рече (Господь) ко мне: сыне человечь, послю тя аз к дому израилеву, огорчевающым мя, иже огорчиша мя: сами и отцы их отвергошася мене до днешняго дне: ⁴ и сынове жестоколичнии и твердосердечнии. Аз послю тя к тем, и речеши к ним: тако глаголет адонаи Господь: ⁵ аще убо услышат, или убоятся, зане дом огорчеваяй есть, и познают, яко пророк еси ты посреде их. ⁶ И ты, сыне человечь, да не убоишися их, ни ужасайся от лица их: зане разсверепеют и обыдут тя окрест, посреде бо скорпиев ты живеши: словес их не убойся и от лица их не ужасайся, зане дом огорчеваяй есть: ⁷ и возглаголеши словеса моя к ним, аще убо услышат, или убоятся, зане дом прогневаяй есть. ⁸ И ты, сыне человечь, послушай глаголющаго к тебе, не буди огорчеваяй, якоже дом преогорчеваяй: отверзи уста твоя и снеждь, яже аз даю тебе. ⁹ И видех, и се, рука простерта ко мне, и в ней свиток книжный: ¹⁰ и разви его предо мною, и в том писана быша предняя и задняя: и вписано бяше в нем рыдание и жалость и горе.