¹ Сия книга повелений Божиих и закон сый во век: вси держащиися ея в живот (внидут), оставившии же ю умрут. ² Обратися, иакове, и имися ея, ходи ко сиянию прямо света ея. ³ Не даждь иному славы твоея, и полезных тебе языку чуждему. ⁴ Блажени есмы, израилю, яко угодная Богу нам разумна суть. ⁵ Дерзайте, людие мои, память израилева. ⁶ Продани бысте языком не на пагубу: понеже разгневасте Бога, предани бысте супостатом, ⁷ преогорчисте бо сотворшаго вас, (Бога вечнаго,) пожерше бесом, а не Богу: ⁸ забысте бо Господа питающаго вас, опечалисте же и воспитавшаго вас Иерусалима. ⁹ Виде бо нашедший вам гнев от Бога и рече: слышите, приселницы сиони, наведе бо ми Господь сетование велико, ¹⁰ видех бо пленение людий сынов моих и дщерей, еже наведе им вечный. ¹¹ Питах бо я с веселием, испустих же я с плачем и рыданием. ¹² Никтоже да радуется о мне вдовице и оставленней от многих, опустех за грехи чад моих, понеже уклонишася от закона Божия, ¹³ и оправданий его не познаша, и не ходиша в путех заповедий Божиих, ниже стезьми наказания в правде его ступаша. ¹⁴ Да приидут окрестнии сиони, и помяните пленение сынов моих и дщерей, еже наведе им вечный: ¹⁵ наведе бо на ня язык издалеча, язык безстудный и иноязычный: ¹⁶ понеже не усрамишася старца, ни помиловаша отрочате, и отведоша любезных вдовичих, и от дщерей едину опустошиша. ¹⁷ Аз же како мощен помощи вам? ¹⁸ Наведый бо вам злая избавит вас от руки враг ваших. ¹⁹ Идите, чада, идите: аз бо остахся пуста, ²⁰ совлекохся ризы мирныя, облекохся же во вретище моления моего: возопию к вечному во дни моя. ²¹ Дерзайте, чада, возопийте к Богу, и избавит вас от насилия руки вражия. ²² Аз бо (исперва) надеяхся на вечнаго о спасении вашем: и прииде ми радость от святаго в помиловании, еже приидет вам вскоре от вечнаго спаса нашего. ²³ Испустих бо вас с рыданием и плачем, отдаст же ми Бог вас с радостию и веселием в век. ²⁴ Якоже бо ныне видеша приселницы сиони ваше пленение (от Бога), такожде узрят вскоре спасение ваше от Бога, еже приидет вам со славою великою и со освещением вечнаго. ²⁵ Чада, долготерпите иже от Бога нашедший вам гнев, гонил бо тя враг твой, и узриши пагубу его вскоре и на выю его наступиши. ²⁶ Младии мои ходиша в пути жестоки, восхищени суть, якоже стадо похищено врагами. ²⁷ Дерзайте, чада, и возопийте к Богу, будет бо вам от наведшаго память. ²⁸ Якоже бо бысть ум ваш заблудити вам от Бога, тако ныне десятижды усугубите обратившеся взыскати его: ²⁹ наведый бо вам злая наведет вам вечное веселие со спасением вашим. ³⁰ Дерзай, Иерусалиме, утешит тя нарекий тебе. ³¹ Окаянни озлобившии тя и радовавшиися о падении твоем, (мщение будет над ними). ³² Окаянни гради, имже поработаша чада твоя, окаянна приимшая сыны твоя. ³³ Якоже бо порадовася о твоем падении и возвеселися о разорении твоем, такожде опечалится о своем запустении. ³⁴ И отсеку от нея веселие многонародства, и величание ея будет в рыдание. ³⁵ Огнь и найдет на ню от вечнаго во дни многи, и населится бесами на множайшее время. ³⁶ Воззри на восток, Иерусалиме, и виждь веселие грядущее тебе от Бога. ³⁷ Се, грядут сынове твои, ихже испустил еси, грядут собрани от восток даже до запад словом святаго, радующеся о славе Божией.