¹ Господи вседержителю, Боже израилев, душа в тесноте и дух в стужении возопи к тебе: ² услыши, Господи, и помилуй, яко еси Бог милосерд, и помилуй нас, яко согрешихом пред тобою: ³ яко ты пребываяй во век, мы же погибающии во век. ⁴ Господи вседержителю, Боже израилев, услыши молитву умерших израилевых и сынов согрешивших пред тобою, иже не послушаша гласа Господа Бога своего, и прильпоша нам злая. ⁵ Не помяни неправд отец наших, но помяни руку твою и имя твое в сие время, ⁶ яко ты Господь Бог наш, и похвалим тя, Господи: ⁷ яко того ради дал еси страх твой в сердце наше, еже призывати имя твое, и похвалим тя во преселении нашем, яко отвратихом от сердца нашего всю неправду отец наших согрешивших пред тобою. ⁸ Се, мы днесь во преселении нашем, аможе ны разсыпал еси на укоризну и на клятву и на удержание, по всем неправдам отец наших, иже отступиша от тебе, Господи Боже наш. ⁹ Слыши, израилю, заповеди живота, внуши разумети смышление. ¹⁰ Что есть, израилю? что яко еси на земли вражии? обетшал еси на земли чуждей, осквернился еси с мертвыми, ¹¹ вменился еси с сущими во аде, ¹² оставил еси источника премудрости. ¹³ Аще бы путем Божиим ходил еси, жил бы в мире во время вечное. ¹⁴ Научися, где есть смышление, где есть крепость, где есть мудрость? еже разумети купно, где есть долгожитие и жизнь, где есть свет очес и мир? ¹⁵ Кто обрете место ея, и кто вниде в сокровища ея? ¹⁶ Где суть князи язычестии и владеющии зверьми сущими на земли, играющии птицами небесными ¹⁷ и хранящии злато и сребро, на неже уповаша человецы, и несть конца стяжанию их? ¹⁸ яко делающии сребро и пекущиися, и несть изобретения дел их. ¹⁹ Погибоша и во ад снидоша, и инии вместо их восташа. ²⁰ Юнейшии видеша свет и вселишася на земли, пути же хитрости не уведеша, ²¹ ни разумеша стезь ея, ниже прияша ея сынове их, от пути своего далече быша. ²² И не слышася в ханаане, ниже явися во фемане: ²³ сынове агарини взыскующии разума, иже на земли, купцы мерани и фемани, и баснословцы и взыскателие разума, пути премудрости не уведеша, ниже помянуша стезь ея. ²⁴ о, израилю, коль велик дом Божий и пространно место селения его! ²⁵ Велико и не имать конца, высоко и безмерно. ²⁶ Тамо быша исполини именитии, бывшии исперва зело велицы, умеюще воевати. ²⁷ Не сих избра Бог, ни пути хитростнаго даде им, ²⁸ и погибоша, занеже не имеша мудрости, погибоша за безсоветие свое. ²⁹ Кто взыде на небо, и взя ю, и снесе ю от облак? ³⁰ Кто прейде на ону страну моря, и обрете ю, и возмет ю за злато избранно? ³¹ Несть ведущаго путь ея, ни помышляющаго стезь ея: ³² но ведый вся весть ю, изобрете ю смыслом своим: сотворивый землю в вечное время наполни ю скотом двоножным и четвероножным. ³³ Посылаяй свет, и идет: призва его, и послуша его со трепетом. ³⁴ Звезды же возсияша во хранилищих своих и возвеселишася. ³⁵ Призва я, и рекоша: приидохом: возсияша с веселием сотворшему я. ³⁶ Сей Бог наш, не вменится ин к нему. ³⁷ Изобрете всяк путь хитрости и даде ю иакову отроку своему и израилю возлюбленному от него. ³⁸ Посем на земли явися и с человеки поживе.