¹ И устави Господь слово свое, еже глагола на нас и на судий наших, судивших во израили, и на цари нашя и на князи нашя, и на всякаго человека израилева и иудина, ² навести на ны зло велие, еже не сотворися под всем небесем, якоже сотворися во Иерусалиме, по писанным в законе моисеове, ³ еже ясти нам плоть человеческу сына своего и плоть человеческу дщере своея. ⁴ И даде я подручны всем царствам, яже окрест нас, на укоризну и в непрохождение во всех людех, иже окрест нас, аможе их разсея Господь. ⁵ И быхом во исподи, а не в верху, яко согрешихом Господеви Богу нашему, не слушающе гласа его. ⁶ Господеви Богу нашему правда, нам же и отцем нашым стыдение лиц, якоже день сей. ⁷ Иже глагола Господь на нас вся злая, сия приидоша на ны, ⁸ зане не молихомся лицу Господню, еже отвратитися комуждо от мыслей сердца своего злаго. ⁹ И убудися Господь о злобах и наведе на нас сия, (яже постигоша ны,) яко праведен Господь во всех делех своих, яже заповеда нам. ¹⁰ И не послушахом гласа его ходити в повелениих его, яже даде пред лицем нашим. ¹¹ И ныне, Господи Боже израилев, иже извел еси люди твоя из земли египетския рукою крепкою и мышцею высокою, знамении и чудесы и силою великою, и сотворил еси себе имя, якоже день сей, ¹² согрешихом, нечествовахом, неправдовахом, Господи Боже наш, во всех оправданиих твоих. ¹³ Да отвратится убо от нас ярость твоя, яко остася нас мало во языцех, аможе разсеял ны еси. ¹⁴ Услыши, Господи, молитву нашу и прошение наше, и избави нас тебе ради, и даждь нам благодать пред лицем преселивших нас: ¹⁵ да увесть вся земля, яко ты Господь Бог наш, и яко имя твое призвася на израили и на племени его. ¹⁶ Господи, призри из дому святаго твоего на нас и вонми нам, и приклони ухо твое и услыши нас. ¹⁷ Отверзи, Господи, очи твои и виждь, яко не умершии, иже во аде, ихже взяся дух их от утроб их, воздадят тебе славу и оправдание Господеви: ¹⁸ но душа сетующая о величестве зла, иже ходит слячен и боляй, и очи оскудевающии, и душа алчущая воздадят тебе славу и правду, Господи! ¹⁹ Яко не по оправданием отец наших, ни царей наших (изливаем молитвы) мы, и предлагаем молитвы нашя пред лицем твоим, Господи Боже нашъ! ²⁰ Яко послал еси ярость твою и гнев твой на нас, якоже глаголал еси рукою отрок твоих пророк, глаголя: ²¹ тако рече Господь: приклоните рамена ваша и послужите царю вавилонскому, и седите на земли, юже дах отцем вашым: ²² и аще не послушаете гласа Господня, еже работати царю вавилонску, оскудение сотворю из градов иудиных и внеуду Иерусалима, ²³ и отиму (от вас) глас веселия и глас радования, глас жениха и глас невесты, и будет вся земля в непрохождение от живущих. ²⁴ И не послушахом гласа твоего служити царю вавилонску: и уставил еси словеса твоя, яже глаголал еси рукою отрок твоих пророков, еже изнести кости царей наших и кости отец наших от места их. ²⁵ И се, суть извержены зною дневному и студени нощней, и изомроша болезньми злыми, гладом и мечем и затчением. ²⁶ И положил еси дом твой, в немже наречеся имя твое, якоже день сей, злобы ради дому израилева и дому иудина. ²⁷ И сотворил еси в нас, Господи Боже наш, по всей тихости твоей и по всем щедротам твоим великим, ²⁸ якоже глаголал еси рукою раба твоего моисеа в день, в оньже заповедал еси ему вписати закон твой пред сыны израилевыми, глаголя: ²⁹ аще не послушаете гласа моего, множество сие великое и многое обратится в мал язык во языцех, аможе аз разсею я: ³⁰ разумех бо, яко не имут послушати мене, яко людие жестоковыйни суть, и обратятся к сердцу своему на земли преселения своего, ³¹ и уведят, яко аз Господь Бог их: и дам им сердце, (и уразумеют,) и ушы, и услышат, ³² и похвалят мя на земли преселения своего, и помянут имя мое, ³³ и обратятся от хребта своего жестокаго и от злоб своих, яко помянут путь отец своих согрешивших пред Господем: ³⁴ и возвращу я на землю, еюже кляхся отцем их, аврааму и исааку и иакову, и возобладают ею: и умножу я, и не умалятся: ³⁵ и уставлю им завет вечен, еже быти мне им в Бога, и тии будут мне людие: и не подвигну ктому людий моих израиля и земли, юже дах им.