¹ Списание послания ко отводимым пленником в вавилон от царя вавилонскаго, еже посла иеремиа, возвестити им, якоже повелено бысть ему от Бога. ² Грех ради, имиже согрешисте пред Богом, отведетеся в вавилон пленени навуходоносором царем вавилонским. ³ Вшедше убо в вавилон, будете тамо лета многа и время долго, до седми родов: потом же изведу вас оттуду с миром. ⁴ Ныне же узрите в вавилоне боги сребряны и златы, и каменны и древяны на раменах носимы, показующыя страх языком. ⁵ Блюдитеся убо, да не и вы иноплеменником уподобитеся, и страх приимет вас от них: видевше народ напреди и созади их кланяющься им, рцыте убо во уме: тебе лепо есть кланятися, Владыко! ⁶ Ангел бо мой с вами есть, сей взыскует душ ваших. ⁷ Язык бо их изстроган есть древоделею, тии же позлащени и посребрени, лживи же суть и не могут глаголати, ⁸ и якоже девице красотолюбивей вземлюще злато, устрояют венцы на главы богов своих. ⁹ Темже украдают от них жерцы злато и сребро и себе употребляют. ¹⁰ Дадят же от них и блудницам сущым в дому, а боги украшают аки человеков ризами, боги златыя и сребряныя и древяныя. ¹¹ Тии же не уцелеют от ржи и молия, одеют же я в багряницу. ¹² Отирают лица им праха ради, иже от храма, иже есть множайший на них. ¹³ И скипетр имут, яко человек и яко судия страны, иже согрешающаго к себе не убиет. ¹⁴ Имать же и мечь в деснице и секиру, сам же себе от рати и от разбойник не отимет: отсюду знаеми суть, яко не суть бози: не убойтеся убо их. ¹⁵ Якоже бо сосуд человеческ сокрушен непотребен бывает, ¹⁶ тацы суть бози их: егда же поставлени будут в домех, очи их полны суть праха от ногу входящих. ¹⁷ И якоже кому преобидевшу царя, заключени бывают дворы, или яко на смерть отводиму, храмы их утверждают жерцы дверьми и замками и заворами, да от разбойник окрадени не будут. ¹⁸ Светила жгут им, и множае неже себе, от нихже ни едино могут видети. ¹⁹ Суть убо яко бервна в дому, сердца же их точат черви, иже от земли, и одежду их, они же не чувствуют сего. ²⁰ Очернело есть лице их от дыма храмины: ²¹ по телесем их и по главе парят нетопыри нощнии, и ластовицы и птицы, такожде и котки (скачут). ²² От того увесте, яко не суть бози не убойтеся убо их. ²³ Злато бо лежащее на них на красу, аще не очистит кто от ржи, не возблистают: егда бо сливаху их, не чувствоваша. ²⁴ За всяку цену куплени суть, в нихже несть духа. ²⁵ Без ног на рамех носятся, являюще свое безчестие человеком, осрамляются же и служащии им: ²⁶ занеже, егда когда падутся на землю, и не могут сами востати: и аще кто поставит я прямо, не могут поступити, и аще преклонятся, не могут исправити себе, но яко мертвецем дары им полагают. ²⁷ Требы же их продающе жерцы на зло употребляют: такожде и жены их варят от них, ни единому же убогу, ни немощну подают: ²⁸ треб их нечистыя и кровоточныя жены прикасаются. Уразумевше убо от сих, яко не суть бози, не бойтеся их. ²⁹ Откуду бо прозовутся бози, яко жены служат богом сребряным и златым и древяным? ³⁰ И во храмех их жерцы седают, имуще ризы растерзаны и главы и брады обриты, ихже главы не покровены суть: ³¹ ревут же вопиюще пред боги своими, якоже нецыи на вечери мертвеца. ³² От риз их вземлюще жерцы, одевают жены своя и дети. ³³ И аще от кого зло постраждут или добро, не могут отдати: ни царя могут поставити, ни отяти: ³⁴ такожде ни богатства ни меди могут дати. Аще кто им что обещав не отдаст, не воспросят. ³⁵ От смерти человека не избавят, ни менша от крепка не отимут: ³⁶ человека слепа к видению не навратят, в нужди человеку не помогут, ³⁷ вдовы не помилуют и сироте добра не сотворят. ³⁸ Подобни суть камению нагорному бози их древяни и каменни, и позлащени и посребрени, служащии же им посрамятся. ³⁹ Како убо мощно мнети или прозвати я богами? ⁴⁰ Ктому же и сами тии халдее не чтут их: иже егда узрят нема не могуща глаголати, приносят его к вилу, емуже молятся, да глаголет, аки сильну сущу почути. ⁴¹ И не могут тии разумевше сие оставити я, чувства бо не имут. ⁴² Жены же обложены ужами на распутиих седят, кадящя отребы. ⁴³ Егда же которая от них привлечена от некоего мимоходяща будет с ним, ближнюю укаряет, яко не сподобилася якоже и она, ни уже ея преторгнулося. ⁴⁴ Вся бываемая в них лжива суть: како убо мощно мнети или прозывати я богами быти? ⁴⁵ Древоделями и златари сотворени суть: ничтоже ино бывают, но еже хотят художницы, то бывают. ⁴⁶ И сами, иже их творят, не бывают долговечни. ⁴⁷ Како убо сотворенная ими могут быти бози? оставиша бо по себе лжу и укоризну потом будущым: ⁴⁸ егда бо приидет на них рать и злая, совещавают между собою жерцы, где скрыются с ними. ⁴⁹ Како убо несть чувствовати, яко не суть бози, иже не избавляют себе от рати, ни от зла? ⁵⁰ Древяни суще и каменни, и позлащени и посребрени, познаются потом языком всем, яко лжа суть: и царем явни будут, яко не суть бози, но дела рук человеческих, и ни едино дело Божие в них есть: ⁵¹ кому убо несть разумно, яко не суть бози? ⁵² Царя бо стране не поставляют, ни дождя человеком подают, ⁵³ ни суда разсудят и не избавят от обиды, немощни суще: ⁵⁴ якоже бо враны между небом и землею суть: и егда падет огнь на храме богов древяных или каменных, или позлащеных или посребреных, жерцы их избегнут и уцелеют, они же яко бервна посреде сгорят. ⁵⁵ Царю же и ратным не станут противу: убо како мощно мнети или прияти, яко бози суть? ⁵⁶ Ни от разбойник, ни от татей избавят себе бози древяни и каменни, и посребрени и позлащени. ⁵⁷ ухже преодолевше и вземше злато и сребро и ризы их, отидут, ниже сами себе помогут. ⁵⁸ Темже лучше есть царь показуяй свое мужество, или сосуд в дому потребен, егоже употребляет владяй им, нежели лживии бози: или дверь в дому стрегущи яже в нем, нежели лживии бози: и древяный столп в дому царстем, нежели лживии бози. ⁵⁹ Солнце бо и луна и звезды, светлы суще и посылаемы на потребу, благопослушливы суть. ⁶⁰ Такожде и молния, егда блистает, благовидна есть: такожде и ветр во всей стране веет. ⁶¹ И облаком егда повелится от Бога ити на всю вселенную, совершают повеленное. ⁶² Огнь же пущен свыше истребити горы и дубравы творит повеленное: сии же ни образом, ниже силам их уподоблени суть. ⁶³ Темже ни мнети мощно, ни прозывати их быти боги, не сильным им сущым ни прю разсудити, ни добра сотворити человеком. ⁶⁴ Разумевше убо, яко не суть бози, не бойтеся их. ⁶⁵ Ни царей бо прокленут, ниже благословят. ⁶⁶ Знамения же на небеси и во языцех не покажут: ни просветят яко солнце, ни осветят яко луна. ⁶⁷ Зверие лучше их суть, иже могут, избеге под кров, себе пользовати. ⁶⁸ Ни единым убо образом есть нам яве, яко суть бози: темже не бойтеся их. ⁶⁹ Якоже бо во овощнице пужало ничесоже хранит, такожде и бози их суть древяни и каменни, и посребрени и позлащени. ⁷⁰ Тем же образом и хвраст, иже во ограде, на немже вся птицы седают: такожде и мертвецу повержену во тме подобни суть бози их, древяни, позлащени и посребрени. ⁷¹ От багряницы, (в нюже одеяни,) и от мрамора, иже на них плеснивеет, познайте, яко не суть бози: тии бо последи изядени будут от червия и будут во укоризну во стране. ⁷² Лучше убо есть человек праведен не имеяй кумиров, будет бо далече от укоризны.