¹ И бе вся земля устне едине, и глас един всем. ² И бысть внегда поити им от восток, обретоша поле в земли сеннаарстей и вселишася тамо. ³ И рече человек ближнему своему: приидите, сотворим плинфы и испечем их огнем. И бысть им плинфа в камень, и брение вместо мела. ⁴ И рекоша: приидите, созиждем себе град и столп, егоже верх будет даже до небесе: и сотворим себе имя, прежде неже разсеятися нам по лицу всея земли. ⁵ И сниде Господь видети град и столп, егоже созидаша сынове человечестии. ⁶ И рече Господь: се, род един, и устне едине всех, и сие начаша творити: и ныне не оскудеют от них вся, елика аще восхотят творити. ⁷ Приидите, и сошедше смесим тамо язык их, да не услышат кийждо гласа ближняго (своего). ⁸ И разсея их оттуду Господь по лицу всея земли: и престаша зиждуще град и столп. ⁹ Сего ради наречеся имя его смешение, яко тамо смеси Господь устна всея земли, и оттуду разсея их Господь по лицу всея земли. ¹⁰ И сия бытия симова: и бяше сим сын ста лет, егда роди арфаксада, во второе лето по потопе: ¹¹ и поживе сим, повнегда родити ему арфаксада, лет пять сот и роди сыны и дщери: и умре. ¹² И поживе арфаксад лет сто тридесять пять и роди каинана: ¹³ и поживе арфаксад, повнегда родити ему каинана, лет триста тридесять и роди сыны и дщери: и умре. И поживе каинан лет сто тридесять и роди салу: и поживе каинан, повнегда родити ему салу, лет триста тридесять и роди сыны и дщери: и умре. ¹⁴ И поживе сала лет сто тридесять и роди евера: ¹⁵ и поживе сала, повнегда родити ему евера, лет триста тридесять и роди сыны и дщери: и умре. ¹⁶ И поживе евер лет сто тридесять четыри и роди фалека: ¹⁷ и поживе евер, повнегда родити ему фалека, лет триста седмьдесят и роди сыны и дщери: и умре. ¹⁸ И поживе фалек лет сто тридесять и роди рагава: ¹⁹ и поживе фалек, повнегда родити ему рагава, лет двесте девять и роди сыны и дщери: и умре. ²⁰ И поживе рагав лет сто тридесять два и роди серуха: ²¹ и поживе рагав, повнегда родити ему серуха, лет двесте седмь и роди сыны и дщери: и умре. ²² И поживе серух лет сто тридесять и роди нахора: ²³ и поживе серух, повнегда родити ему нахора, лет двесте и роди сыны и дщери: и умре. ²⁴ И поживе нахор лет седмьдесят девять и роди фарру: ²⁵ и поживе нахор, повнегда родити ему фарру, лет сто двадесять девять и роди сыны и дщери: и умре. ²⁶ И поживе фарра лет седмьдесят и роди аврама и нахора и аррана. ²⁷ Сия же бытия фарры: фарра роди аврама и нахора и аррана. Арран же роди лота: ²⁸ и умре арран пред фаррою отцем своим в земли, в нейже родися, в стране халдейстей. ²⁹ И пояста аврам и нахор себе жены: и имя жене аврамли сара, и имя жене нахорове мельха, дщи арраня: сей есть отец мельхин и отец есхин. ³⁰ Бяше же сара неплоды и не раждаше детей. ³¹ И поят фарра аврама сына своего и лота сына арраня, сына сына своего, и сару сноху свою, жену аврама сына своего: и изведе я из земли халдейския ити на землю ханаанску: и приидоша даже до харрана и вселишася тамо. ³² Быша же вси дние фаррины в земли харрани лет двесте пять: и умре фарра в харране.