¹ Сия книга бытия человеча, в оньже день сотвори Бог адама, по образу Божию сотвори его, ² мужа и жену сотвори их и благослови их: и нарече имя ему адам, в оньже день сотвори их. ³ Поживе же адам лет двесте тридесять и роди сына по виду своему и по образу своему, и нарече имя ему сиф. ⁴ Быша же дние адамовы, яже поживе, по еже родити ему сифа, лет седмь сот, и роди сыны и дщери. ⁵ И быша вси дние адамовы, яже поживе, лет девять сот и тридесять: и умре. ⁶ Поживе же сиф лет двесте пять и роди еноса. ⁷ И поживе сиф, по еже родити ему еноса, лет седмь сот и седмь, и роди сыны и дщери. ⁸ И быша вси дние сифовы лет девять сот и дванадесять: и умре. ⁹ И поживе енос лет сто девятьдесят и роди каинана. ¹⁰ И поживе енос, по еже родити ему каинана, лет седмь сот и пятьнадесять, и роди сыны и дщери. ¹¹ И быша вси дние еносовы лет девять сот и пять: и умре. ¹² И поживе каинан лет сто седмьдесят и роди малелеила. ¹³ И поживе каинан, по еже родити ему малелеила, лет седмь сот и четыредесять, и роди сыны и дщери. ¹⁴ И быша вси дние каинановы лет девять сот и десять: и умре. ¹⁵ И поживе малелеил лет сто шестьдесят пять и роди иареда. ¹⁶ И поживе малелеил, по еже родити ему иареда, лет седмь сот и тридесять, и роди сыны и дщери. ¹⁷ И быша вси дние малелеиловы лет осмь сот и девятьдесят пять: и умре. ¹⁸ И поживе иаред лет сто шестьдесят два и роди еноха. ¹⁹ И поживе иаред, по еже родити ему еноха, лет осмь сот, и роди сыны и дщери. ²⁰ И быша вси дние иаредовы лет девять сот и шестьдесят два: и умре. ²¹ И поживе енох лет сто шестьдесят пять и роди мафусала. ²² Угоди же енох Богу, и поживе енох, по еже родити ему мафусала, лет двесте, и роди сыны и дщери. ²³ И быша вси дние еноховы лет триста шестьдесят пять. ²⁴ И угоди енох Богу, и не обреташеся, зане преложи его Бог. ²⁵ И поживе мафусал лет сто осмьдесят седмь и роди ламеха. ²⁶ И поживе мафусал, по еже родити ему ламеха, лет седмь сот осмьдесят два, и роди сыны и дщери. ²⁷ И быша вси дние мафусаловы, яже поживе, лет девять сот и шестьдесят девять: и умре. ²⁸ И поживе ламех лет сто осмьдесят осмь и роди сына, ²⁹ и нарече имя ему ное, глаголя: сей упокоит нас от дел наших и от печали рук наших, и от земли, юже прокля Господь Бог. ³⁰ И поживе ламех, по еже родити ему ноа, лет пять сот и шестьдесят пять, и роди сыны и дщери. ³¹ И быша вси дние ламеховы лет седмь сот и пятьдесят три: и умре. ³² И бе ное лет пяти сот, и роди сыны три, сима, хама, иафефа.