¹ На ложи моем в нощех исках, егоже возлюби душа моя, исках его, и не обретох его: воззвах его, и не послуша мене. ² Востану убо и обыду во граде и на торжищих и на стогнах, и поищу, егоже возлюби душа моя. Поисках его, и не обретох его: звах его, и не послуша мене. ³ Обретоша мя стрегущии, обходяще во граде: видесте ли, егоже возлюби душа моя? ⁴ Яко мало егда преидох от них, дондеже обретох, егоже возлюби душа моя: удержах его, и не оставих его, дондеже введох его в дом матере моея и в чертог заченшия мя. ⁵ Заклях вас, дщери Иерусалимския, в силах и в крепостех селных: аще подвижете и воздвижете любовь, дондеже аще восхощет. ⁶ Кто сия восходящая от пустыни, яко стебло дыма кадящее смирну и ливан, от всех благовоний мироварца? ⁷ Се, одр соломонь, шестьдесят сильных окрест его от сильных израилевых, ⁸ вси имуще оружия, научени на брань: муж, оружие его на бедре его от ужаса в нощех. ⁹ Одр сотвори себе царь соломон от древес ливанских. ¹⁰ Столпы его сотвори сребряны и восклонение его злато: восход его багрян, внутрь его камение постлано, любовь от дщерей Иерусалимских. ¹¹ Дщери сиони, изыдите и видите в цари соломоне в венце, имже венча его мати его в день обручения его и в день веселия сердца его.