¹ Аз цвет польный и крин удольный. ² Якоже крин в тернии, тако искренняя моя посреде дщерей. ³ Яко яблонь посреде древес лесных, тако брат мой посреде сынов: под сень его восхотех и седох, и плод его сладок в гортани моем. ⁴ Введите мя в дом вина, вчините ко мне любовь: ⁵ утвердите мя в мирех, положите мя во яблоцех: яко уязвлена (есмь) любовию аз. ⁶ Шуйца его под главою моею, и десница его оымет мя. ⁷ Заклях вас, дщери Иерусалимли, в силах и крепостех села: аще возставите и возбудите любовь, дондеже восхощет. ⁸ Глас брата моего: се, той идет, скача на горы и прескача на холмы. ⁹ Подобен есть брат мой серне или младу еленю на горах вефильских. Се, сей стоит за стеною нашею, проглядаяй оконцами, приницаяй сквозе мрежи. ¹⁰ Отвещает брат мой и глаголет мне: востани, прииди, ближняя моя, добрая моя, голубице моя. ¹¹ Яко се, зима прейде, дождь отиде, отиде себе: ¹² цвети явишася на земли, время обрезания приспе, глас горлицы слышан в земли нашей: ¹³ смоквь изнесе цвет свой, виногради зреюще даша воню. Востани, прииди, ближняя моя, добрая моя, голубице моя, и прииди. ¹⁴ Ты, голубице моя, в покрове каменне, близ предстения: яви ми зрак твой, и услышан сотвори ми глас твой: яко глас твой сладок, и образ твой красен. ¹⁵ Имите нам лисы малыя, губящыя винограды: и виногради наши созревают. ¹⁶ Брат мой мне, и аз ему, пасый в кринах, ¹⁷ дондеже дхнет день, и двигнутся сени. Обратися, уподобися ты, брате мой, серне или младу еленю на горах юдолий.