¹ Да лобжет мя от лобзаний уст своих: яко блага сосца твоя паче вина, ² и воня мира твоего паче всех аромат. Миро излияное имя твое: сего ради отроковицы возлюбиша тя. ³ Привлекоша тя: вслед тебе в воню мира твоего течем. Введе мя царь в ложницу свою: возрадуемся и возвеселимся о тебе, возлюбим сосца твоя паче вина: правость возлюби тя. ⁴ Черна есмь аз и добра, дщери Иерусалимския, якоже селения кидарска, якоже завесы соломони. ⁵ Не зрите мене, яко аз есмь очернена, яко опали мя солнце: сынове матере моея сваряхуся о мне, положиша мя стража в виноградех: винограда моего не сохраних. ⁶ Возвести ми, егоже возлюби душа моя, где пасеши? где почиваеши в полудне? да не когда буду яко облагающаяся над стады другов твоих. ⁷ Аще не увеси самую тебе, добрая в женах, изыди ты в пятах паств и паси козлища твоя у кущей пастырских. ⁸ Конем моим в колесницех фараоновых уподобих тя, ближняя моя. ⁹ Что украшены ланиты твоя яко горлицы, выя твоя яко монисты? ¹⁰ подобия злата сотворим ти с пестротами сребра. ¹¹ Дондеже (будет) царь на восклонении своем, нард мой даде воню свою. ¹² Вязание стакти брат мой мне, посреде сосцу моею водворится: ¹³ грезн кипров брат мой мне в виноградех енгаддовых. ¹⁴ Се, еси добра, искренняя моя, се, еси добра: очи твои голубине. ¹⁵ Се, еси добр, брат мой, и еще красен: одр наш со осенением, ¹⁶ преклади дому нашего кедровии, дски нашя кипарисныя.