¹ Мухи умершыя згнояют елеа сладость: честно малое мудрости паче славы велики безумия. ² Сердце мудраго одесную его, сердце же безумнаго ошуюю его: ³ и в путь егда безумный идет, сердце его лишается, и яже помышляет, вся безумие суть. ⁴ Аще дух владеющаго взыдет на тя, места твоего не остави: яко изцеление утолит грехи велики. ⁵ Есть лукавство, еже видех под солнцем, аки невольно изыде от лица владеющаго: ⁶ вдан безумный в высоты велики, а богатии во смиренных сядут: ⁷ видех рабов на конех, и князей идущих яко рабов на земли. ⁸ Копаяй яму впадет в ню, и разоряющаго ограду угрызнет его змий. ⁹ Иземляй камение поболит от них, разсецаяй дрова беду приимет в них: ¹⁰ аще спадет сечиво, и сам лицем смятется: и силы укрепит, и изюбилие мужу мудрость. ¹¹ Аще угрызнет змий не в шепте, и несть излишества обавающему. ¹² Словеса уст премудраго благодать, устне же безумнаго потопят его: ¹³ начало словес уст его безумие, и последняя уст его прелесть лукава. ¹⁴ Безумный умножает словеса: не разуме человек, что бывшее и что будущее, что созади его, (и) кто возвестит ему? ¹⁵ Труд безумных озлобит их, иже не разуме ити во град. ¹⁶ Горе тебе, граде, в немже царь твой юн, и князи твои рано ядят. ¹⁷ Блаженна ты, земле, еяже царь твой сын свободных, и князи твои во время ядят в силе и не постыдятся. ¹⁸ В леностех смирится строп, и в празднестве рук прокаплет храмина. ¹⁹ Во смех творят хлеб и вино и елей, еже веселитися живущым: и сребра со смирением послушают всяческая. ²⁰ И в совести убо твоей не клени царя, и в клети ложницы твоея не клени богатаго: яко птица небесная донесет глас твой, и имеяй криле возвестит слово твое.