¹ Есть лукавствие, еже видех под солнцем, и много есть над человеком: ² муж, емуже даст Бог богатство и имение и славу, и несть лишаяй души своей от всех, ихже вожделеет, и не даст ему Бог власти от него ясти, яко чуждь муж ясти имать от него. И сие суета и недуг зол есть. ³ Аще родит муж сто (чад) и лета многа поживет, и мнози будут дние лет его, и душа его не насытится от благостыни, и погребения не бысть ему, рех: благ паче его изверг, ⁴ яко в суете прииде и во тму идет, и во тме имя его покрыется: ⁵ и солнца не виде, ниже разуме, покой сему паче того: ⁶ и поживе тысящу лет сугубо, и благостыни не виде: еда не во едино место вся идут? ⁷ Весь труд человечь во уста его, и душа его не исполнится. ⁸ Яко кое изюбилие (человеку) мудрому паче безумнаго? понеже нищь позна ходити противу живота. ⁹ Благо видение очию паче ходящаго душею. И се суетствие и произволение духа. ¹⁰ Аще что бысть, уже именовася имя его, и познася, еже есть человек и не возможет судитися с крепчайшим паче себе: ¹¹ яко суть словеса многа умножающая суету.