¹ И обратихся аз и видех вся оклеветания бывающая под солнцем: и се, слезы оклеветанных, и несть им утешающаго, и от руки клевещущих на ня крепость, и несть им утешающаго. ² И похвалих аз всех умерших, иже умроша уже, паче живых, елицы живи суть доселе: ³ и благ паче обоих сих, иже еще не бысть, иже не виде всякаго сотворения лукаваго сотвореннаго под солнцем. ⁴ И видех аз весь труд и всяко мужество сотворения, яко сие ревность мужа от подруга своего. И сие суета и произволение духа. ⁵ Безумный объят руце свои и снеде плоти своя. ⁶ Благо есть исполнение горсти покоя, паче исполнения двою горстию труда и произволения духа. ⁷ И обратихся аз и видех суетство под солнцем: ⁸ есть един, и несть втораго, ни сына, ниже брата несть ему, и несть конца всему труду его, ниже око его насыщается богатства. И кому аз труждаюся и лишаю душу мою от благостыни? И сие суета и попечение лукавно есть. ⁹ Блази два паче единаго, имже есть мзда блага в труде их: ¹⁰ яко аще падется един от них, воздвигнет другий причастника своего: и горе тому единому, егда падет и не будет втораго воздвигнути его. ¹¹ И аще уснета два, тепло има будет, а един како согреется? ¹² И аще укрепится един, два станета противу ему: и вервь треплетена не скоро расторгнется. ¹³ Благ отрок нищь и мудр, паче стара царя и безумна, иже не разуме внимати еще: ¹⁴ яко из дому юзников изыдет царствовати, понеже и в царстве своем родися нищь. ¹⁵ Видех всех живущих, ходящих под солнцем, с юным вторым, иже востанет вместо его. ¹⁶ Несть конца всем людем, всем, иже пред ними быша, ибо последнии не возвеселятся о нем: яко и сие суета и произволение духа. ¹⁷ Сохрани ногу твою, егда аще идеши в дом Божий, и близ (буди) еже слушати: паче даяния безумных жертва твоя, понеже не ведят, яко творят зло.