¹ Всем время и время всяцей вещи под небесем: ² время раждати и время умирати, время садити и время исторгати сажденое, ³ время убивати и время целити, время разрушати и время созидати, ⁴ время плакати и время смеятися, время рыдати и время ликовати, ⁵ время разметати камение и время собирати камение, время обымати и время удалятися от обымания, ⁶ время искати и время погубляти, время хранити и время отреяти, ⁷ время раздрати и время сшити, время молчати и время глаголати, ⁸ время любити и время ненавидети, время брани и время мира. ⁹ Кое изюбилие творящаго, в нихже сам трудится? ¹⁰ Видех попечение всяческое, еже даде Бог сыном человеческим, еже пещися в нем. ¹¹ Всяческая, яже сотвори, добра (суть) во время свое, ибо всякий век дал есть в сердце их, яко да не обрящет человек сотворения, еже сотвори Бог от начала и даже до конца. ¹² Уразумех, яко несть благо в них, но токмо еже веселитися и еже творити благо в животе своем: ¹³ ибо всяк человек, иже яст и пиет и видит благое во всем труде своем, сие даяние Божие есть. ¹⁴ Разумех, яко вся, елика сотвори Бог, сия будут во век: к тем несть приложити и от тех несть отяти, и Бог сотвори, да убоятся от лица его: ¹⁵ бывшее уже есть, и елика имут быти, уже быша, и Бог взыщет гонимаго. ¹⁶ И еще видех под солнцем место суда, тамо нечестивый, и место праведнаго, тамо благочестивый. ¹⁷ И рех аз в сердцы моем: праведнаго и нечестиваго судит Бог: яко время всяцей вещи и на всяцем сотворении тамо. ¹⁸ Рех аз в сердцы моем о глаголании сынов человеческих, яко разсудит их Бог: и еже показати, яко сии скоти суть: ¹⁹ ибо и тем якоже случай сынов человеческих и случай скотский, случай един им: якоже смерть того, тако и смерть сего, и дух един во всех: и что излишше имать человек паче скота? ничтоже: яко всяческая суета. ²⁰ Вся идут во едино место: вся быша от персти и вся в персть возвращаются. ²¹ И кто весть дух сынов человеческих, аще той восходит горе? и дух скотский, аще низходит той долу в землю? ²² И видех, яко несть благо, но токмо еже возвеселится человек в творениих своих, яко сия часть его: понеже кто приведет его видети то, еже будет по нем?