¹ Лучше муж обличаяй, нежели муж жестоковыйный: внезапу бо палиму ему, несть изцеления. ² Похваляемым праведным, возвеселятся людие: началствующым же нечестивым, стенят мужие. ³ Мужу любящу премудрость, веселится отец его: а иже пасет любодейцы, погубит богатство. ⁴ Царь праведен возвышает землю, муж же законопреступник раскоповает. ⁵ Иже уготовляет на лице своему другу мрежу, облагает ю на своя ноги. ⁶ Согрешающему мужу велия сеть: праведный же в радости и в веселии будет. ⁷ Умеет праведный суд творити убогим, а нечестивый не разумеет разума, и убогому несть ума разумевающаго. ⁸ Мужие беззаконнии сожгоша град, мудрии же отвратиша гнев. ⁹ Муж мудр судит языки, муж же злый гневаяйся посмеваемь бывает, а не устрашает. ¹⁰ Мужие кровей причастни возненавидят преподобнаго, правии же взыщут душу его. ¹¹ Весь гнев свой произносит безумный: премудрый же скрывает по части. ¹² Царю послушающу словесе неправедна, вси, иже под ним, законопреступницы. ¹³ Заимодавцу и должнику, друг со другом сошедшымся, посещение творит обема Господь. ¹⁴ Царю во истине судящему нищым, престол его во свидетелство устроится. ¹⁵ Язвы и обличения дают мудрость: отрок же заблуждаяй срамляет родители своя. ¹⁶ Многим сущым нечестивым мнози греси бывают, праведнии же, оным падающым, устрашаеми бывают. ¹⁷ Наказуй сына твоего, и упокоит тя и даст лепоту души твоей. ¹⁸ Не будет сказатель языку законопреступну, храняй же закон блажен. ¹⁹ Не накажется словесы раб жесток: аще бо и уразумеет, но не послушает. ²⁰ Аще увидиши мужа скора в словесех, разумей, яко упование имать паче его безумный. ²¹ Иже ласкосерд будет от детства, поработится, на последок же болезновати будет о сем. ²² Муж гневливый воздвизает свар, муж же ярый открывает грехи. ²³ Досаждение мужа смиряет, а смиренныя утверждает Господь в славе. ²⁴ Иже сообщается татю, ненавидит своея души: аще же клятву предложенную слышавшии не возвестят, ²⁵ убоявшеся и постыдевшеся человеков, преткнутся: надеявыйся же на Господа возвеселится. Нечестие мужу дает соблажнение: уповаяй же на Владыку спасется. ²⁶ Мнози угождают лицам началников: от Господа же сбывается правда мужу. ²⁷ Мерзость праведнику муж неправеден: мерзость же законопреступному путь правоведяй.