¹ Сыне, не ревнуй мужем злым, ниже возжелей быти с ними: ² лжам бо поучается сердце их, и болезни устне их глаголют. ³ С премудростию зиждется дом и с разумом исправляется. ⁴ С чувствием исполняются сокровища от всякаго богатства честнаго и добраго. ⁵ Лучше мудрый крепкаго, и муж разум имеяй земледелца велика. ⁶ Со управлением бывает брань, помощь же с сердцем советным. ⁷ Премудрость и мысль блага во вратех премудрых: смысленнии не укланяются от закона Господня, ⁸ но советуют в сонмищих. Ненаказанных сретает смерть, ⁹ умирает же безумный во гресех. Нечистота мужу губителю: ¹⁰ осквернится в день зол и в день печали, дондеже оскудеет. ¹¹ Избави ведомыя на смерть и искупи убиваемых, не щади. ¹² Аще же речеши: не вем сего: разумей, яко Господь всех сердца весть, и создавый дыхание всем, сей весть всяческая, иже воздаст комуждо по делом его. ¹³ Яждь мед, сыне, благ бо есть сот, да насладится гортань твой: ¹⁴ сице уразумееши премудрость душею твоею: аще бо обрящеши, будет добра кончина твоя, и упование не оставит тебе. ¹⁵ Не приводи нечестиваго на пажить праведных, ниже прельщайся насыщением чрева: ¹⁶ седмерицею бо падет праведный и востанет, нечестивии же изнемогут в злых. ¹⁷ Аще падет враг твой, не обрадуйся ему, в преткновении же его не возносися: ¹⁸ яко узрит Господь, и не угодно ему будет, и отвратит ярость свою от него. ¹⁹ Не радуйся о злодеющих и не ревнуй грешным, ²⁰ не пребудут бо внуцы лукавых, светило же нечестивых угаснет. ²¹ Бойся Бога, сыне, и царя, и ни единому же их противися: ²² внезапу бо истяжут нечестивых, мучения же обоих кто увесть? Слово сохраняяй сын кроме погибели будет: приемляй же прият оное. Ничтоже ложно от языка цареви да глаголется, и ни едина лжа от языка его да изыдет: меч (есть) язык царев, а не плотян: и иже аще предан будет, сокрушится: аще бо раздражится ярость его, со жилами человеки губит, и кости человеческия поядает и сожигает яко пламень, яко не ядомым быти птенцами орлими. Моих словес, сыне, бойся, и приим я покайся. ²³ Сия же вам смысленным глаголю разумети: срамлятися лица на суде не добро. ²⁴ Глаголяй нечестиваго, яко праведен есть, проклят от людий будет и возненавиден во языцех: ²⁵ обличающии же лучшии явятся, на няже приидет благословение благо: ²⁶ и устне облобызают отвещающыя словеса блага. ²⁷ Уготовляй на исход дела твоя, и уготовися на село, и ходи вслед мене, и созиждеши дом твой. ²⁸ Не буди свидетель лжив на твоего гражданина, ниже пространяйся твоима устнама. ²⁹ Не рцы: имже образом сотвори ми, сотворю ему и отмщу ему, имиже мя преобиде. ³⁰ Якоже нива муж безумный, и яко виноград человек скудоумный: ³¹ аще оставиши его, опустеет и травою порастет весь, и будет оставлен, ограды же каменныя его раскопаются. ³² Последи аз покаяхся, воззрех избрати наказание: ³³ мало дремлю, мало же сплю и мало о‹емлю рукама перси: ³⁴ аще же сие твориши, приидет предидущи нищета твоя и скудость твоя, яко благ течец.