¹ Лучше имя доброе, неже богатство много, паче же сребра и злата благодать благая. ² Богат и нищь сретоста друг друга, обоих же Господь сотвори. ³ Худог, видев лукаваго мучима крепко, сам наказуется: безумнии же мимошедше отщетишася. ⁴ Род премудрости страх Господень, и богатство и слава и живот. ⁵ Волчцы и сети на путех стропотных, храняй же свою душу избежит их. ⁶ Богатии убогими имут обладати, ⁷ и раби своим господем взаим дадут. ⁸ Сеявый злая пожнет злая, язву же дел своих совершит. ⁹ Мужа тиха и даятеля любит Господь, суету же дел его скончает. ¹⁰ Милуяй нищаго сам препитается: от своих бо хлебов даде убогому. Победу и честь устрояет даяй дары, обаче душу погубляет стяжавших. ¹¹ Изжени от сонмища губителя, и изыдет с ним прение: егда бо сядет в сонмищи, всех безчестит. ¹² Любит Господь преподобная сердца, приятни же ему вси непорочнии в путех своих: устнама пасет царь (люди своя). ¹³ Очи Господни соблюдают чувство: презирает словеса законопреступный. ¹⁴ Вины ищет и глаголет ленивый: лев на стезях, на путех же разбойницы. ¹⁵ Яма глубока уста законопреступных: возненавиденый же от Господа впадется в ню. Суть путие злии пред мужем, и не любит возвратитися от них: возвратитися же подобает от пути стропотна и злаго. ¹⁶ Безумие висит на сердцы юнаго: жезл же и наказание далече (отгонит) от него. ¹⁷ Обидяй убогаго многая себе зла творит, дает же богатому во оскудение (себе). ¹⁸ Ко словесем мудрых прилагай твое ухо, и услыши моя словеса: свое же сердце утверди (к ним), да разумееши, яко добра суть. ¹⁹ И аще вложиши я в сердце твое, возвеслят тебе купно во твоих устнех. ²⁰ Да будет ти на Господа надежда, и покажет ти путь свой. ²¹ Ты же напиши я себе трижды, на совет и смысл и разум, на широте сердца твоего: учу бо тя истинному словеси, и разума благаго слушати на ответы словесем истинным предлагаемым тебе. ²² Не насильствуй нищаго, зане убог есть, и не досаждай немощному во вратех: ²³ Господь бо имать судити его суд, и избавиши твою безбедную душу. ²⁴ Не бывай друг мужу гневливу и со другом жестокосердым не соводворяйся: ²⁵ да не когда научишися путем его и приимеши тенета души твоей. ²⁶ Не вдавайся в поручение, стыдяся лица: ²⁷ егда бо не будеши имети чим искупитися, возмут постелю, яже под ребры твоими. ²⁸ Не прелагай предел вечных, яже положиша отцы твои. ²⁹ Прозрителну человеку и острому в делех своих пред царьми подобает стояти, и не стояти пред мужми простыми.