¹ Якоже устремление воды, тако сердце царево в руце Божией: аможе аще восхощет обратити, тамо уклонит е. ² Всяк муж является себе праведен: управляет же сердца Господь. ³ Творити праведная и истинствовати угодна Богу паче, нежели жертв кровь. ⁴ Велемудрый во укоризне дерзосерд, светило же нечестивых греси. ⁵ Помышления тщаливаго во изюбилии, и всяк нерадивый в лишении. ⁶ Делаяй сокровища языком лживым суетная гонит в сети смертныя. ⁷ Всегубителство на нечестивыя устремляется: не хотят бо творити праведная. ⁸ К стропотным стропотныя пути посылает Бог: чиста бо и права дела его. ⁹ Лучше жити во угле непокровеннем, нежели в повапленных с неправдою и в храмине общей. ¹⁰ Душа нечестиваго не помилуется ни от единаго от человеков. ¹¹ Тщету приемлющу невоздержному, коварнейший будет незлобивый, разумеваяй же мудрый приимет разум. ¹² Разумевает праведный сердца нечестивых и уничтожает нечестивыя в злых. ¹³ Иже затыкает ушеса своя, еже не послушати немощнаго, и той призовет, и не будет послушаяй его. ¹⁴ Даяние тайно отвращает гневы, щадяй же даров воздвизает ярость крепкую. ¹⁵ Веселие праведных творити суд: преподобный же нечист у злодеев. ¹⁶ Муж заблуждаяй от пути правды в сонмищи исполинов почиет. ¹⁷ Муж скуден любит веселие, любяй же вино и елей не обогатится. ¹⁸ Отребие же праведнику беззаконник. ¹⁹ Лучше жити в земли пусте, неже жити с женою сварливою и язычною и гневливою. ²⁰ Сокровище вожделенно почиет во устех мудраго: безумнии же мужие пожирают е. ²¹ Путь правды и милостыни обрящет живот и славу. ²² Во грады крепки вниде премудрый и разруши утверждение, на неже надеяшася нечестивии. ²³ Иже хранит своя уста и язык, соблюдает от печали душу свою. ²⁴ Продерзый и величавый и горделивый губитель нарицается: а иже памятозлобствует, беззаконен. ²⁵ Похоти лениваго убивают: не произволяют бо руце его творити что. ²⁶ Нечестивый желает весь день похоти злыя, праведный же милует и щедрит нещадно. ²⁷ Жертвы нечестивых мерзость Господеви: ибо беззаконно приносят я. ²⁸ Свидетель ложный погибнет, муж же послушлив сохраняемь возглаголет. ²⁹ Нечестив муж безстудно стоит лицем: правый же сам разумевает пути своя. ³⁰ Несть премудрости, несть мужества, несть совета у нечестиваго. ³¹ Конь уготовляется на день брани: от Господа же помощь.