¹ Вины ищет муж хотя отлучитися от другов, на всяко же время поносимь будет. ² Не требует премудрости муж скудоумен, зане паче водится безумием. ³ Егда приидет нечестивый во глубину зол, нерадит: находит же ему безчестие и поношение. ⁴ Вода глубока слово в сердцы мужа, река же изскачущи и источник жизни. ⁵ Чудитися лицу нечестиваго не добро, ниже преподобно укланяти праведное на суде. ⁶ Устне безумнаго приводят его на зло, уста же его дерзостная призывают смерть. ⁷ Уста безумнаго сокрушение ему, устне же его сеть души его. ⁸ Ленивыя низлагает страх: души же мужей женам подобных взалчут. ⁹ Не изцеляяй себе во своих делех брат есть погубляющему себе самаго. ¹⁰ Из величества крепости имя Господне, к немуже притекающе праведницы возносятся. ¹¹ Имение богату мужу град тверд, слава же его вельми присеняет. ¹² Прежде сокрушения возносится сердце мужу и прежде славы смиряется. ¹³ Иже отвещает слово прежде слышания, безумие ему есть и поношение. ¹⁴ Гнев мужа укрощает раб разумный: малодушна же человека кто стерпит? ¹⁵ Сердце разумнаго стяжет чувствие, ушеса же мудрых ищут смысла. ¹⁶ Даяние человека распространяет его и с сильными посаждает его. ¹⁷ Праведный себе самаго оглаголник во первословии: егда же приложит супостат, обличается. ¹⁸ Прекословия утоляет молчаливый и во властех определяет. ¹⁹ Брат от брата помогаемь, яко град тверд и высок, укрепляется же якоже основаное царство. ²⁰ От плодов уст муж насыщает чрево свое, и от плодов устен своих насытится. ²¹ Смерть и живот в руце языка: удержавающии же его снедят плоды его. ²² Иже обрете жену добру, обрете благодать, приял же есть от Господа тишину. ²³ Иже изгоняет жену добрую, изгоняет благая: держай же прелюбодейцу безумен и нечестив. ²⁴ С молении глаголет убогий, богатый же отвещает жестоко. ²⁵ Муж любовен к дружбе, и есть друг прилепивыйся паче брата.