¹ Сын благоразумный послушлив отцу, сын же непокорливый в погибель. ² От плодов правды снесть благий: душы же беззаконных погибают безвременно. ³ Иже хранит своя уста, соблюдает свою душу: продерзивый же устнама устрашит себе. ⁴ В похотех есть всяк праздный: руки же мужественных в прилежании. ⁵ Словесе неправедна ненавидит праведник: нечестивый же стыдится и не возимет дерзновения. ⁶ Правда хранит незлобивыя: нечестивыя же злы творит грех. ⁷ Суть богатяще себе, ничесоже имуще: и суть смиряющеся во мнозе богатстве. ⁸ Избавление мужа души свое ему богатство: нищий же не терпит прещения. ⁹ Свет праведным всегда, свет же нечестивых угасает: души льстивыя заблуждают во гресех, праведнии же щедрят и милуют. ¹⁰ Злый с досаждением творит злая: себе же знающии премудри (суть). ¹¹ Имение поспешаемо со беззаконием умалено бывает, собираяй же себе со благочестием изобилствовати будет: праведный щедрит и дает. ¹² Лучше начинаяй помогати сердцем обещающаго и в надежду ведущаго: древо бо жизни желание доброе. ¹³ Иже презирает вещь, презрен будет от нея: а бояйся заповеди, сей здравствует. ¹⁴ Сыну лукавому ничтоже есть благо: рабу же мудру благопоспешна будут дела, и исправится путь его. ¹⁵ Закон мудрому источник жизни: безумный же от сети умрет. ¹⁶ Разум благ дает благть: разумети же закон, мысли есть благия: путие же презирающих в погибели. ¹⁷ Всяк хитрый творит с разумом, безумный же прострет свою злобу. ¹⁸ Царь дерзостен впадет во злая, вестник же мудр избавит его. ¹⁹ Нищету и безчестие отемлет наказание: храняй же обличения прославится. ²⁰ Желания благочестивых наслаждают душу, дела же нечестивых далече от разума. ²¹ Ходяй с премудрыми премудр будет, ходяй же с безумными познан будет. ²² Согрешающих постигнут злая, праведных же постигнут благая. ²³ Благ муж наследит сыны сынов: сокровищствуется же праведным богатство нечестивых. ²⁴ Праведнии насладятся в богатстве лета многа: неправеднии же погибнут вскоре. ²⁵ Иже щадит жезл (свой), ненавидит сына своего: любяй же наказует прилежно. ²⁶ Праведный ядый насыщает душу свою: душы же нечестивых скудны.