¹ Любяй наказание любит чувство: ненавидяй же обличения безумен. ² Лучше обретый благодать от Господа Бога: муж же законопреступен премолчан будет. ³ Не исправится человек от беззаконнаго: корения же праведных не отимутся. ⁴ Жена мужественная венец мужу своему: якоже в древе червь, тако мужа погубляет жена злотворная. ⁵ Мысли праведных судьбы: управляют же нечестивии лести. ⁶ Словеса нечестивых льстива в кровь, уста же правых избавят их. ⁷ Аможе обратится нечестивый, изчезает: храмины же праведных пребывают. ⁸ Уста разумнаго хвалима бывают от мужа: слабосерд же поругаемь бывает. ⁹ Лучше муж в безчестии работаяй себе, нежели честь себе обложив и лишаяйся хлеба. ¹⁰ Праведник милует душы скотов своих: утробы же нечестивых немилостивны. ¹¹ Делаяй свою землю исполнится хлебов: гонящии же суетная лишени разума. Иже есть сладостен в виннем пребывании, во своих твердынех оставит безчестие. ¹² Желания нечестивых зла: корение же благочестивых в твердостех. ¹³ За грех устен впадает в сети грешник: избегает же от них праведник. Сматряяй кротко помилован будет, а сретаяй во вратех оскорбит душы. ¹⁴ От плодов уст душа мужа наполнится благих, воздаяние же устен его воздастся ему. ¹⁵ Путие безумных прави пред ними: послушает советов мудрый. ¹⁶ Безумный абие исповесть гнев свой: крыет же свое безчестие хитрый. ¹⁷ Явленную веру возвещает праведный: свидетель же неправедных льстив. ¹⁸ Суть, иже глаголюще уязвляют аки мечи: языцы же премудрых изцеляют. ¹⁹ Устне истинны исправляют свидетелство: свидетель же скор язык имать неправеден. ²⁰ Лесть в сердцы кующаго злая: хотящии же мира возвеселятся. ²¹ Ничтоже неправедное угодно есть праведному: нечестивии же исполнятся злых. ²² Мерзость Господеви устне лживы: творяй же верно приятен ему. ²³ Муж разумивый престол чувствия: сердце же безумных срящет клятвы. ²⁴ Рука избранных одержит удобь: льстивии же будут во пленении. ²⁵ Страшное слово сердце мужа праведна смущает, весть же благая веселит его. ²⁶ Разумив праведник себе друг будет: мысли же нечестивых некротки: согрешающих постигнут злая, путь же нечестивых прельстит я. ²⁷ Не улучит льстивый ловитвы: стяжание же честное муж чистый. ²⁸ В путех правды живот, путие же злопомнящих в смерть.