¹ Сыне, храни моя словеса, моя же заповеди скрый у себе. Сыне, чти Господа, и укрепишися: кроме же его не бойся иного. ² Храни моя заповеди, и поживеши, словеса же моя яко зеницы очию: ³ обложи же ими твоя персты, напиши же я на скрижали сердца твоего. ⁴ Нарцы премудрость сестру тебе быти, разум же знаемь сотвори тебе, ⁵ да тя соблюдет от жены чуждия и лукавыя, аще тя словесы льстивыми облагати начнет: ⁶ оконцем бо из дому своего на пути приничущи, ⁷ егоже аще узрит от безумных чад юношу скудоумна, ⁸ проходящаго мимо угла в распутиих дому ея ⁹ и глаголющаго в темный вечер, егда упокоение будет нощное и мрачное: ¹⁰ жена же срящет его, зрак имущи прелюбодейничь, яже творит юных парити сердцам: воскрилена же есть и блудна, ¹¹ в дому же не почивают нозе ея: ¹² время бо некое вне глумится, время же на распутиих при всяцем угле приседит: ¹³ потом емши лобзает его, безстудным же лицем речет к нему: ¹⁴ жертва мирна ми есть, днесь воздаю обеты моя: ¹⁵ сего ради изыдох в сретение тебе, желающи лица твоего, обретох тя: ¹⁶ простиралами покрых одр мой, коврами же сугубыми постлах, иже от египта, ¹⁷ шафраном посыпах ложе мое и дом мой корицею: ¹⁸ прииди и насладимся любве даже до утра, гряди и поваляемся в похоти: ¹⁹ несть бо мужа моего в дому, отиде в путь далече, ²⁰ доволно сребра взя с собою, по многих днех возвратится в дом свой. ²¹ И прельсти его многою беседою, тенетами же устен (в блуд) привлече его. ²² Он же абие последова ей о‹юродев, и якоже вол на заколение ведется, и яко пес на узы, ²³ или яко елень уязвлен стрелою в ятра: и спешит яко птица в сеть, не ведый, яко на душу свою течет. ²⁴ Ныне убо, сыне, послушай мене и внимай глаголом уст моих, ²⁵ да не уклонится в пути ея сердце твое, ²⁶ и да не прельстишися в стезях ея: многих бо уязвивши низверже, и безчисленни суть, ихже убила есть: ²⁷ путие адовы дом ея, низводящии в сокровища смертная.