¹ Сыне, аще поручишися за твоего друга, предаси твою руку врагу. ² Сеть бо крепка мужу свои устне, и пленяется устнами своих уст. ³ Твори, сыне, яже аз заповедую ти, и спасайся: идеши бо в руце злых за твоего друга: буди не ослабевая, поощряй же и твоего друга, егоже испоручил еси. ⁴ Не даждь сна твоима очима, ниже да воздремлеши твоима веждома, ⁵ да спасешися аки серна от тенет и яко птица от сети. ⁶ Иди ко мравию, о, лениве, и поревнуй видев пути его, и буди онаго мудрейший: ⁷ он бо, не сущу ему земледелцу, ниже нудящаго его имеяй, ниже под владыкою сый, ⁸ готовит в жатву пищу и многое в лето творит уготование. Или иди ко пчеле и увеждь, коль делателница есть, делание же коль честное творит: еяже трудов царие и простии во здравие употребляют, любима же есть всеми и славна: аще силою и немощна сущи, (но) премудростию почтена произведеся. ⁹ Доколе, о, лениве, лежиши? когда же от сна востанеши? ¹⁰ Мало убо спиши, мало же седиши, мало же дремлеши, мало же о‹емлеши перси рукама: ¹¹ потом же найдет тебе аки зол путник убожество: скудость же аки благий течец. Аще же не ленив будеши, приидет яко источник жатва твоя, скудость же аки злый течец (от тебе) отбежит. ¹² Муж безумен и законопреступный ходит в пути не благи: ¹³ той же намизает оком и знамение дает ногою, учит же помаванием перстов. ¹⁴ Развращенно же сердце кует злая: на всякое время таковый мятежы составляет граду. ¹⁵ Сего ради внезапу приходит ему погибель, разсечение и сокрушение неизцельное. ¹⁶ Яко радуется о всех, ихже ненавидит Бог, сокрушается же за нечистоту души: ¹⁷ око досадителя, язык неправедный, руце проливающя кровь праведнаго, ¹⁸ и сердце кующее мысли злы, и нозе тщащыяся зло творити потребятся. ¹⁹ Разжизает лжы свидетель неправеден и насылает суды посреде братий. ²⁰ Сыне, храни законы отца твоего и не отрини наказания матере твоея: ²¹ навяжи же я на твою душу присно и обяжи их о твоей выи. ²² Егда ходиши, води ю, и с тобою да будет: егда же спиши, да хранит тя, да востающу ти глаголет с тобою. ²³ Зане светилник заповедь закона и свет, и путь жизни, и обличение, и наказание, ²⁴ еже сохранити тя от жены мужаты и от наваждения языка чуждаго. ²⁵ Сыне, да не победит тя доброты похоть, ниже уловлен буди твоима очима, ниже да совосхитишися веждами ея. ²⁶ Цена бо блудницы, елика единаго хлеба: жена же мужей честныя душы уловляет. ²⁷ Ввяжет ли кто огнь в недра, риз же (своих) не сожжет ли? ²⁸ Или ходити кто будет на углиех огненных, ног же не сожжет ли? ²⁹ Тако вшедый к жене мужатей не без вины будет, ниже всяк прикасайся ей. ³⁰ Не дивно, аще кто ят будет крадый: крадет бо, да насытит душу свою алчущую: ³¹ аще же ят будет, воздаст седмерицею, и вся имения своя дав, избавит себе. ³² Прелюбодей же за скудость ума погибель души своей содевает, ³³ болезни же и безчестие понесет: поношение же его не загладится во век: ³⁴ исполнена бо ревности ярость мужа ея: не пощадит в день суда, ³⁵ не изменит ни единою ценою вражды, ниже разрешится многими дарми.