¹ Послушайте, дети, наказания отча и внемлите разумети помышление, ² дар бо благий дарую вам: моего закона не оставляйте. ³ Сын бо бых и аз отцу послушливый, и любимый пред лицем матере, ⁴ иже глаголаша и учиша мя: да утверждается наше слово в твоем сердцы: храни заповеди, не забывай: ⁵ стяжи премудрость, стяжи разум: не забуди, ниже презри речения моих уст, ниже уклонися от глагол уст моих. ⁶ Не остави ея, и имется тебе: возжелей ея, и соблюдет тя. ⁷ Начало премудрости: стяжати премудрость, и во всем стяжании твоем стяжи разум. ⁸ Огради ю, и вознесет тя: почти ю, да тя оымет, ⁹ да даст главе твоей венец благодатей, венцем же сладости защитит тя. ¹⁰ Слыши, сыне, и приими моя словеса, и умножатся лета живота твоего, да ти будут мнози путие жития. ¹¹ Путем бо премудрости учу тя, наставляю же тебе на течения правая: ¹² аще бо ходиши, не запнутся стопы твоя: аще ли течеши, не утрудишися. ¹³ Имися моего наказания, не остави, но сохрани е себе в жизнь твою. ¹⁴ На пути нечестивых не иди, ниже возревнуй путем законопреступных. ¹⁵ На немже аще месте воя соберут, не иди тамо: уклонися же от них и измени: ¹⁶ не уснут бо, аще зла не сотворят: отимется сон от них, и не спят: ¹⁷ тии бо питаются пищею нечестия, вином же законопреступным упиваются. ¹⁸ Путие же праведных подобне свету светятся: предходят и просвещают, дондеже исправится день. ¹⁹ Путие же нечестивых темни: не ведят, како претыкаются. ²⁰ Сыне, моим глаголом внимай, к моим же словесем прилагай ухо твое: ²¹ да не оскудеют ти источницы твои, храни я в сердцы твоем: ²² живот бо суть всем обретающым я и всей плоти их изцеление. ²³ Всяцем хранением блюди твое сердце: от сих бо исходища живота. ²⁴ Отими от себе строптива уста, и обидливы устне далече от тебе отрини. ²⁵ Очи твои право да зрят, и вежди твои да помавают праведная. ²⁶ Права течения твори твоима ногама и пути твоя исправляй. ²⁷ Не уклонися ни на десно, ни на шуе: отврати же ногу твою от пути зла: ²⁸ пути бо десныя весть Господь, развращени же суть, иже ошуюю. ²⁹ Той же права сотворит течения твоя, и хождения твоя в мире поспешит.