1 Хвалите, отроцы, Господа, хвалите имя Господне. 2 Буди имя Господне благословено отныне и до века. 3 От восток солнца до запад хвально имя Господне. 4 Высок над всеми языки Господь: над небесы слава его. 5 Кто яко Господь Бог наш? на высоких живый, 6 и на смиренныя призираяй на небеси и на земли: 7 воздвизаяй от земли нища, и от гноища возвышаяй убога: 8 посадити его с князи, с князи людий своих: 9 вселяя неплодовь в дом, матерь о чадех веселящуся.