¹ В конец, сыном кореовым, псалом. ² Благоволил еси, Господи, землю твою, возвратил еси плен иаковль. ³ Оставил еси беззакония людий твоих, покрыл еси вся грехи их. ⁴ Укротил еси весь гнев твой, возвратился еси от гнева ярости твоея. ⁵ Возврати нас, Боже спасений наших, и отврати ярость твою от нас. ⁶ Еда во веки прогневаешися на ны? или простреши гнев твой от рода в род? ⁷ Боже, ты обращься оживиши ны, и людие твои возвеселятся о тебе. ⁸ Яви нам, Господи, милость твою, и спасение твое даждь нам. ⁹ Услышу, что речет о мне Господь Бог: яко речет мир на люди своя, и на преподобныя своя, и на обращающыя сердца к нему. ¹⁰ Обаче близ боящихся его спасение его, вселити славу в землю нашу. ¹¹ Милость и истина сретостеся, правда и мир облобызастася: ¹² истина от земли возсия, и правда с небесе приниче: ¹³ ибо Господь даст благость, и земля наша даст плод свой. ¹⁴ Правда пред ним предидет, и положит в путь стопы своя.