¹ Псалом давиду, егоже воспет Господеви о словесех хусиевых, сына иемениина. ² Господи Боже мой, на тя уповах, спаси мя от всех гонящих мя и избави мя: ³ да не когда похитит яко лев душу мою, не сущу избавляющу, ниже спасающу. ⁴ Господи Боже мой, аще сотворих сие, аще есть неправда в руку моею, ⁵ аще воздах воздающым ми зла, да отпаду убо от враг моих тощь: ⁶ да поженет убо враг душу мою, и да постигнет, и поперет в землю живот мой, и славу мою в персть вселит. ⁷ воскресени, Господи, гневом твоим, вознесися в концах враг твоих, и востани, Господи Боже мой, повелением, имже заповедал еси, ⁸ и сонм людий обыдет тя: и о том на высоту обратися. ⁹ Господь судит людем: суди ми, Господи, по правде моей и по незлобе моей на мя. ¹⁰ Да скончается злоба грешных, и исправиши праведнаго, испытаяй сердца и утробы, Боже, праведно. ¹¹ Помощь моя от Бога, спасающаго правыя сердцем. ¹² Бог судитель праведен и крепок, и долготерпелив, и не гнев наводяй на всяк день. ¹³ Аще не обратитеся, оружие свое очистит, лук свой напряже, и уготова и, ¹⁴ и в нем уготова сосуды смертныя, стрелы своя сгараемым содела. ¹⁵ Се, боле неправдою, зачат болезнь и роди беззаконие: ¹⁶ ров изры и ископа и, и падет в яму, юже содела. ¹⁷ Обратится болезнь его на главу его, и на верх его неправда его снидет. ¹⁸ Исповемся Господеви по правде его и пою имени Господа вышняго.