¹ Аще уразумел еси время рождения коз живущих на горах каменных? усмотрил же ли еси болезнь при рождении еленей? ² изчислил же ли еси месяцы их исполнены рождения их, болезни же их разрешил ли еси? ³ Вскормил же ли еси детищы их вне страха, болезни же их отслеши ли? ⁴ извергнут чада своя, умножатся в порождении, изыдут и не возвратятся к ним. ⁵ Кто же есть пустивый осла дивияго свободна, узы же его кто разрешил? ⁶ Положих же жилище его пустыню и селения его сланость: ⁷ смеяйся многу народу града, стужания же данническаго не слышай, ⁸ усмотрит на горах пажить себе и вслед всякаго злака ищет. ⁹ Похощет же ли ти единорог работати, или поспати при яслех твоих? ¹⁰ привяжеши ли ремением иго его, и провлечет ти бразды на поли? ¹¹ надеешилися нань, яко многа крепость его? попустиши же ли ему дела твоя? ¹² повериши же ли, яко воздаст ти семя? внесет же ли ти в гумно? ¹³ Крило веселящихся нееласса, аще зачнет асида и несса? ¹⁴ яко оставит на земли яица своя, и на персти согреет, ¹⁵ и забы, яко нога разбиет, и зверие селнии поперут: ¹⁶ ожесточися на чада своя, аки бы не ея, вотще трудися без страха, ¹⁷ яко сокры Бог ей премудрость и не удели ей в разуме: ¹⁸ во время же на высоту вознесет, посмеется коню и седящему на нем. ¹⁹ Или ты обложил еси коня силою, и облекл же ли еси выю его в страх? ²⁰ обложил же ли еси его всеюружием, славу же персей его дерзостию? ²¹ копытом копая на поли играет и исходит на поле с крепостию: ²² сретая стрелы посмеявается и не отвратится от железа: ²³ над ним играет лук и мечь, ²⁴ и гневом потребит землю и не имать веры яти, дондеже вострубит труба: ²⁵ трубе же вострубившей глаголет, благоже: издалеча же обоняет рать, со скаканием и ржанием. ²⁶ И твоею ли хитростию стоит ястреб, распростер криле недвижимь, зря на юг? ²⁷ Твоим же ли повелением возносится орел, неясыть же на гнезде своем седя вселяется, ²⁸ на версе камене и в сокровене? ²⁹ тамо же сый ищет брашна, издалеча очи его наблюдают, ³⁰ птичищи же его валяются в крови: идеже аще будут мертвечины, абие обретаются. ³¹ И отвеща Господь Бог ко иову и рече: ³² еда суд со всесильным укланяется? обличаяй же Бога отвещати имать ему. ³³ Отвещав же иов, рече Господеви: ³⁴ почто еще аз прюся, наказуемь и обличаемь от Господа, слышай таковая ничтоже сый? аз же кий ответ дам к сим? руку положу на устех моих: ³⁵ единою глаголах, вторицею же не приложу.