¹ Но послушай, иове, словес моих и беседу мою внуши: ² се бо, отверзох уста моя, и возглагола язык мой: ³ чисто сердце мое во словесех, разум же устну моею чистая уразумеет: ⁴ дух Божий сотворивый мя, дыхание же вседержителево поучающее мя: ⁵ аще можеши, даждь ми ответ к сим: потерпи, стани противу мене, и аз противу тебе. ⁶ От брения сотворен еси ты, якоже и аз: от тогожде сотворения есмы: ⁷ не страх мой тя смятет, ниже рука моя тяжка будет на тя. ⁸ Обаче рекл еси во ушы мои, и глас глагол твоих услышах, занеже глаголеши: ⁹ чист есмь аз, не согрешая, непорочен же есмь, ибо не беззаконновах: ¹⁰ зазор же на мя обрете и мнит мя, яко противника себе: ¹¹ вложи же ногу мою в древо и надсмотрял пути моя вся. ¹² Како бо глаголеши, яко прав есмь, и не послуша мене? Вечен бо есть, иже над земными. ¹³ Глаголеши бо: чесо ради правды моея не услыша всяко слово? ¹⁴ Единою бо возглаголет Господь, второе же во сне, или в поучении нощнем, ¹⁵ или, яко егда нападает страх лют на человеки, во дреманиих на ложи: ¹⁶ тогда открыет ум человеческий, виденьми страха тацеми их устрашит, ¹⁷ да возвратит человека от неправды, тело же его от падения избави, ¹⁸ пощаде же душу его от смерти, еже не пасти ему на брани. ¹⁹ Паки же обличи его болезнию на ложи и множество костей его разслаби: ²⁰ всякаго же брашна пшенична не возможет прияти, а душа его яди хощет, ²¹ дондеже согниют плоти его, и покажет кости его тощя: ²² приближися же на смерть душа его, и живот его во аде. ²³ Аще будет тысяща ангел смертоносных, един от них не уязвит его: аще помыслит сердцем обратитися ко Господу, повесть же человеку свой зазор, и безумие свое покажет, ²⁴ заступит е, еже не впасти ему в смерть, обновит же тело его якоже повапление на стене, кости же его исполнит мозга: ²⁵ умягчит же его плоть якоже младенца, и устроит его возмужавша в человецех. ²⁶ Помолится же ко Господу и прият им будет, внидет же лицем веселым со исповеданием, воздаст же человеком правду свою. ²⁷ Посем тогда зазрит человек сам себе, глаголя: яковая содевах? и не по достоинству истяза мя, о нихже согреших: ²⁸ спаси душу мою, еже не внити во истление, и жизнь моя свет узрит. ²⁹ Се, сия вся творит крепкий (Бог) пути три с мужем: ³⁰ но избави душу мою от смерти, да живот мой во свете хвалит его. ³¹ Внимай, иове, и послушай мене, премолчи, и аз возглаголю: ³² и аще тебе суть словеса, отвещай ми: глаголи, хощу бо оправдитися тебе: ³³ аще же ни, ты послушай мене, умолчи, и научу тя премудрости.