¹ Отвещав же иов, рече: ² вем убо, яко из руки моея обличение мое есть, и рука его тяжка бысть паче моего воздыхания. ³ Кто убо увесть, яко обрящу его и прииду ко кончине? ⁴ И реку мой суд, уста же моя исполню обличения, ⁵ уразумею же изцеления, яже ми речет, и ощущу, что ми возвестит. ⁶ И аще со многою крепостию найдет на мя, посем же не воспретит ми. ⁷ Истина бо и обличение от него: да изведет же в конец суд мой. ⁸ Аще бо во первых пойду, ктому несмь: в последних же, како вем его? ⁹ ошуюю творящу ему, и не разумех: обложит одесную, и не узрю. ¹⁰ Весть бо уже путь мой, искуси же мя яко злато. ¹¹ Изыду же в заповедех его, пути бо его сохраних, и не уклонюся от заповедий его ¹² и не преступлю, в недрех же моих сокрых глаголголы его. ¹³ Аще же и сам судил тако, кто есть рекий противу ему? сам бо восхоте и сотвори. ¹⁴ Сего ради о нем трепетен бых, наказуемь же попекохся о нем: ¹⁵ сего ради от лица его потщуся, поучуся и убоюся от него. ¹⁶ И Господь умягчил сердце мое, и вседержитель потщася о мне: ¹⁷ не ведех бо, яко найдет на мя тма, пред лицем же моим покрыет мрак.