¹ Отвещав же софар минейский, рече: ² не тако мнех сия тебе рещи противу, и не разумеете паче нежели и аз. ³ Наказание срамления моего услышу, и дух от разума отвещавает ми. ⁴ Еда сих не уразумел еси от века, отнележе положен человек бысть на земли? ⁵ веселие бо нечестивых падение страшно, обрадование же беззаконных пагуба. ⁶ Аще взыдут на небо дары его, жертва же его облаков коснется: ⁷ егда бо мнится уже утвержден быти, тогда в конец погибнет. видевшии же его рекут: где есть? ⁸ Якоже сон отлетевый не обрящется, отлете же аки мечтание нощное. ⁹ Око призре, и не приложит, и ктому не познает его место его. ¹⁰ Сынов его да погубят меншии, и руце его возжгут болезни. ¹¹ Кости его наполнишася грехов юности его и с ним на персти уснут. ¹² Аще усладится во устех его злоба, скрыет ю под языком своим: ¹³ не пощадит ея, и не оставит ея, и соберет ю посреде гортани своего, ¹⁴ и не возможет помощи себе: желчь аспидов во чреве его. ¹⁵ Богатство неправедно собираемо изблюется, из храмины его извлечет его ангел. ¹⁶ Ярость же змиеву да ссет, да убиет же его язык змиин. ¹⁷ Да не узрит отдоения скотов, ниже прибытка меда и масла кравия. ¹⁸ Вотще и всуе трудися, богатство, от негоже не вкусит, якоже клоки не сожваемы и не поглощаемы. ¹⁹ Многих бо немощных домы сокруши, жилище же разграби и не постави. ²⁰ Несть спасения имению его, в вожделении своем не спасется. ²¹ Несть останка брашну его, сего ради не процветут ему благая. ²² Егда же мнит уже исполнь быти, оскорбится, всяка же беда нань приидет. ²³ Аще како либо исполнит чрево свое, напустит нань ярость гнева, одождит на него болезни: ²⁴ и не спасется от руки железа, да устрелит его лук медян, ²⁵ и да пройдет сквозе тело его стрела: звезды же в жилищих его: да приидут нань страси, ²⁶ и всяка тма на нем да пребудет: да пояст его огнь нераздеженый, да озлобит же пришлец дом его: ²⁷ и да открыет небо беззакония его, и земля да востанет нань: ²⁸ да извлечет дом его пагуба до конца, день гнева да приидет нань. ²⁹ Сия часть человека нечестиваго от Господа и стяжание имений его от надзирателя.