¹ Се, сия виде око мое, и слыша ухо мое, ² и вем, елика и вы весте: и не неразумнее есмь вас. ³ Но обаче и аз ко Господу возглаголю, обличу же пред ним, аще восхощет. ⁴ Вы бо есте врачеве неправеднии и целителе злых вси, ⁵ буди же вам онемети, и сбудется вам в премудрость. ⁶ Слышите же обличение уст моих, суду же устен моих вонмите. ⁷ Не пред Богом ли глаголете и пред ним вещаете лесть? ⁸ или уклонитеся, вы же сами судии будите. ⁹ Добро бо, аще изследит вас: аще бо вси творящии приложитеся к нему, обаче обличит вы. ¹⁰ Аще же и тай лицам удивитеся, ¹¹ не движение ли его смятет вас, боязнь же от него нападет на вы? ¹² Отидет же величание ваше равно пепелу, тело же бренно. ¹³ Умолчите, да возглаголю и почию от гнева. ¹⁴ Вземля плоти моя зубами, душу же мою положу в руце моей. ¹⁵ Аще мя убиет сильный, понеже и нача, обаче возглаголю и обличу пред ним: ¹⁶ и сие ми сбудется во спасение: не внидет бо пред ним лесть. ¹⁷ Послушайте, послушайте глагол моих: возвещу бо вам слышащым. ¹⁸ Се, аз близ есмь суда моего, вем аз, яко праведен явлюся. ¹⁹ Кто бо есть судяйся со мною, да ныне умолчу и изчезну? ²⁰ Двое же ми сотвориши, тогда от лица твоего не скрыюся: ²¹ руку от мене отими, страх же твой да не ужасает мя: ²² посем призовеши, аз же тя послушаю, или возглаголеши, аз же ти дам ответ. ²³ Колицы суть греси мои и беззакония моя? научи мя, кая суть? ²⁴ Почто крыешися от мене? мниши же мя противна суща тебе? ²⁵ Или яко лист движимь ветром убоишися? или яко сену носиму ветром противляешимися? ²⁶ Яко написал еси на мя злая, обложил же ми еси юностныя грехи: ²⁷ положил же еси ногу мою в возбранение: сохранил же еси дела моя вся: в корения же ног моих пришел еси: ²⁸ иже обетшают якоже мех, или якоже риза молием изядена.