¹ Отвещав же иов, рече: ² убо вы ли едини есте человецы, или с вами скончается премудрость? ³ И у мене сердце есть якоже и у вас. ⁴ Праведен бо муж и непорочен бысть в поругание: ⁵ во время бо определеное уготован бысть пасти от иных, домы же его опустошены быти беззаконными. обаче никтоже да уповает, лукав сый, неповинен быти, ⁶ елицы разгневляют Господа, аки и истязания им не будет. ⁷ Но вопроси четвероногих, аще ти рекут, и птиц небесных, аще ти возвестят: ⁸ повеждь земли, аще ти скажет, и исповедят ти рыбы морския. ⁹ Кто убо не разуме во всех сих, яко рука Господня сотвори сия? ¹⁰ Не в руце ли его душа всех живущих и дух всякаго человека? ¹¹ Ухо бо словеса разсуждает, гортань же брашна вкушает. ¹² Во мнозем времени премудрость, во мнозе же житии ведение. ¹³ У него премудрость и сила, у того совет и разум. ¹⁴ Аще низложит, кто созиждет? аще затворит от человеков, кто отверзет? ¹⁵ Аще возбранит воду, изсушит землю: аще же пустит, погубит ю превратив. ¹⁶ У него держава и крепость, у того ведение и разум. ¹⁷ Проводяй советники пленены, судии же земли ужаси: ¹⁸ посаждаяй цари на престолех и обвязуяй поясом чресла их: ¹⁹ отпущаяй жерцы пленники, сильных же земли низврати: ²⁰ изменяяй устне верных, разум же старцев уразуме: ²¹ изливаяй безчестие на князи, смиренныя же изцели: ²² открываяй глубокая от тмы, изведе же на свет сень смертную: ²³ прельщаяй языки и погубляяй их, низлагаяй языки и наставляяй их: ²⁴ изменяяй сердца князей земных, прельсти же их на пути, егоже не ведяху, ²⁵ да осяжут тму, а не свет, да заблудят же яко пияный.