¹ Бысть же яко день сей, и приидоша ангели Божии предстати пред Господем, и диавол прииде посреде их предстати пред Господем. ² И рече Господь диаволу: откуду ты грядеши? тогда рече диавол пред Господем: прошед поднебесную и обшед всю землю, приидох. ³ И рече Господь ко диаволу: внял ли еси убо (мыслию твоею) рабу моему иову? яко несть такова от сущих на земли: человек незлобив, истинен, непорочен, Богочестив, удаляяся от всякаго зла, еще же придержится незлобия: ты же рекл еси имения его погубити вотще. ⁴ Отвещав же диавол Господеви, рече: кожу за кожу, и вся, елика имать человек, даст за душу свою: ⁵ обаче посли руку твою и коснися костем его и плоти его, аще не в лице тя благословит. ⁶ Рече же Господь диаволу: се, предаю ти его, токмо душу его соблюди. ⁷ Изыде же диавол от лица Господня и порази иова гноем лютым от ногу даже до главы. ⁸ И взя (иов) чреп, да острогает гной свой, и той седяше на гноищи вне града. ⁹ Времени же многу минувшу, рече к нему жена его: доколе терпиши глаголя: се, пожду время еще мало, чая надежди спасения моего? се бо, потребися от земли память твоя, сынове твои и дщери, моего чрева болезни и труды, имиже вотще трудихся с болезньми: ты же сам в гнои червей седиши, обнощевая вне без покрова, и аз скитающися и служащи, место от места преходящи, и дом от дому, ожидающи солнца, когда зайдет, да почию от трудов моих и от болезней, яже мя ныне обдержат: но рцы глагол некий ко Господу и умри. ¹⁰ Он же воззрев рече к ней: вскую яко едина от безумных жен возглаголала еси? аще благая прияхом от руки Господни, злых ли не стерпим? во всех сих приключившихся ему, ничимже согреши иов устнама пред Богом (и не даде безумия Богу). ¹¹ Услышавше же трие друзие его вся злая нашедшая нань, приидоша кийждо от своея страны к нему: елифаз феманский царь, валдад савхейский властитель, софар минейский царь: и приидоша к нему единодушно утешити и посетити его. ¹² Увидевше же его издалеча, не познаша, и возопивше гласом велиим восплакашася, растерзавше кийждо одежду свою и посыпавше перстию главы своя: ¹³ седеша при нем седмь дний и седмь нощей, и никтоже от них возглагола к нему словесе: видяху бо язву люту сущу и велику зело.