¹ И рече иудиф: начните Богу моему в тимпанех, пойте Господеви моему в кимвалех, красно воспойте ему песнь нову, возносите и призывайте имя его: ² яко Бог сокрушаяй брани Господь, яко во ополчениих его посреде людий изят мя из руки гонящих мя: ³ прииде ассур из гор от севера, прииде во тмах силы своея, ихже множество загради источники, и конница их покры холмы: ⁴ рече пожещи пределы моя, и юношы моя убити мечем, и ссущыя моя положити в помост, и младенцы моя дати в расхищение, и девы моя пленити: ⁵ Господь вседержитель опроверже их рукою жены, ⁶ не бо паде сильный их от юнош, ниже сынове титановы поразиша его, ниже высоцы исполини нападоша на него, но иудиф дщи мерарина добротою лица своего разслаби его: ⁷ совлечеся бо одеяния вдовства своего на возвышение бедствующих во израили, помаза лице свое умащением ⁸ и увенча власы своя увяслом и прият одежду льняну в прельщение его: ⁹ сандалия ея похити око его, и доброта ея плени душу его, пройде мечь выю его: ¹⁰ устрашишася персы державы ея, и миды дерзновением ея разседошася: ¹¹ тогда воскликнуша смиреннии мои и возопиша немощнии мои, и устрашишася: вознесоша глас свой, и побеждени быша: ¹² сынове отроковиц бодоша их и яко рабов беглецов уязвляху их, погибоша от ополчения Господа моего: ¹³ воспою Господеви моему песнь нову: Господи, велий еси и славен, дивен в крепости, непреборимый, ¹⁴ тебе да работает всяка тварь твоя: яко рекл еси, и быша: послал еси духа твоего, и созда: и несть, иже противостанет гласу твоему: ¹⁵ горы бо от основании с водами подвигнутся, камение же от лица твоего яко воск ратает: над боящимися же тебе ты умилостивляешися, ¹⁶ яко мало всяка жертва в воню благоухания, и малейший всяк тук во всесожжение тебе: бояйся же Господа велик выну: ¹⁷ горе языком востающым на род мой: Господь вседержитель отмстит им в день судный, дати огнь и червие на плоти их, и восплачутся в чувстве даже до века. ¹⁸ Егда же внидоша во Иерусалим, поклонишася Богу: и егда очистишася людие, принесоша всесожегаемая своя и произвольная своя и дары своя. ¹⁹ И возложи иудиф вся сосуды олоферновы, елики дадоша людие ей, и завесу, юже взя оиа от ложницы его, в дар Господу даде. ²⁰ И бяху людие веселящеся во Иерусалиме пред лицем святых месяцы три, и иудиф с ними пребысть. ²¹ По днех же сих возвратися кийждо во наследие свое: и иудиф отиде во ветилую, и пребываше над стяжанием своим, и бысть во время свое славна во всей земли. ²² И мнози желаша ея, и не позна муж ея вся дни живота ея, от негоже дне умре манассиа муж ея и приложися к людем своим. ²³ И произыде велика зело, и состареся в дому мужа своего лет ста пяти, и отпусти рабыню свою свободну, и умре во ветилуи, и погребоша ю в пещере мужа ея манассии. ²⁴ И плакася ея дом израилев дний седмь. И раздели имения своя прежде смерти своея всем ближним манассии мужа своего и ближним рода своего. ²⁵ И не бяше ктому устрашаяй сынов израилевых во дни иудифы и по смерти ея дни многи.