¹ И егда утишися мятеж мужей сущих окрест заседания и рече олоферн вождоначалник силы ассурския ко ахиору пред всем народом иноплеменников и ко всем сыном моавлим: ² и кто еси ты, ахиоре, и наемницы ефремли, яко пророчествовал еси в нас, якоже днесь, и рекл еси род израилев не воевати, яко Бог их защищает их? и кто Бог, аще не навуходоносор? сей послет державу свою и истребит их от лица земли, и не избавит их Бог их: ³ но мы раби его поразим их яки человека единаго, и не претерпят крепости коней наших, ⁴ поперем бо их ими, и горы их упиются в крови их, и поля их исполнятся мертвыми их, и не постоит стопа ног их противу лица нашего, но погублением погибнут, глаголет царь навуходоносор, господин всея земли, рече бо: не вотще будут глаголы словес его: ⁵ ты же, ахиоре, наемниче аммонь, иже глаголал еси словеса сия в день неправды твоея, не узриши ктому лица моего от дне сего, дондеже не отмшу роду сущих из египта, ⁶ и тогда пройдет мечь воинства моего и народа рабов моих ребра твоя, и падеши в язвенных их, егда возвращуся: ⁷ и отведут тя раби мои в горнюю, и оставят тя во единем от градов восходов, ⁸ и не погибнеши дондеже истреблен будеши с ними: ⁹ и аще уповаеши сердцем твоим, яко не возмутся да не испадает твое лице: рех, и ничтоже отпадет от глаголов моих. ¹⁰ И повеле олоферн рабом своим, иже предстояху в шатре его, яти ахиора и отвсти его к ветилуи и предати в руки сынов израилевых. ¹¹ И яша его раби его и изведоша его вне полка на поле, и воздвигошася от среды напольныя в горнюю и приидоша на источники, иже быша под ветилуею. ¹² И яко убидеша их мужие града на верху горы, взяша оружия своя и отидоша вне града на верх горы: и бсякий муж пращник одержаша восход свой и метаху камением на них. ¹³ И подшедше под гору, связаша ахиора и оставиша поверженна под коренем горы, и отидоша ко господину своему. ¹⁴ Снизошедше же сынове израилевы от града своего сташа над ним, и разрешивше его введоша в ветилую и поставиша его пред началниками града своего, ¹⁵ иже быша во днех тых, озиа сын михин от племене симеоня, и хаврий сын гофониилев, и хармий сын мелхиилев. ¹⁶ И созваша всех старейшин града: и стекошася всякий юноша их и жены в собрание, и поставиша ахиора посреде всего народа своего. И вопроси его озиа о случившемся. ¹⁷ И отвещав возвести им глаголы заседания олофернова и вся глаголы, елика глагола посреде князей сынов ассурских, и елика велеречева олоферн на дом израилев. ¹⁸ И падше людие поклонишася Богу и возопиша, глаголюще: ¹⁹ Господи Боже небесе, призри на гордыни их, и помилуй смирение рода нашего, и призри на лице освященных теве в день сей. ²⁰ И утешиша ахиора и похвалиша его зело. ²¹ И взя его озиа из собрания в дом свой и сотвори пир старейшинам, и призываху Бога израилева на помощь всю нощь ону.