¹ И преста исповедаяся товит. ² И бе лет осмидесяти осми, егда погуби зраки, и по летех осми прозре: и творяше милостыни, и приложи боятися Господа Бога и исповедатися ему: ³ зело же состареся, и прнзва сына своего и шесть сынов его и рече ему: чадо, возми сыны твоя, се, состарехся и при исхождении от жития есмь: ⁴ пойди в мидию, чадо, уверихся бо, елика глагола иона пророк о ниневии, яко разорится, в мидии же будет мир паче даже до времене, и яко братия наша на земли расточатся от благия земли, и Иерусалим будет пуст, и дом Божий в нем сожжен будет и пуст будет до времене: ⁵ и паки помилует их Бог и возвратит их в землю, и созиждут дом, не яков первый, дондеже исполнятся времена века: и по сих возвратятся от пленений и созиждут Иерусалим честно, и дом Божий в нем созиждется во вся роды века зданием славным, якоже глаголаша о нем пророцы: ⁶ и вси языцы обратятся истинно боятися Господа Бога и опровергнут идолы своя, ⁷ и возблагословят вси языцы Господа, и людие его исповедятся Богу, и вознесет Господь люди своя, и возрадуются вси любящии Господа Бога во истине и правде, творяще милость братии нашей: ⁸ и ныне, чадо, отиди от ниневии, яко всячески будут, яже глагола пророк иона: ⁹ ты же сохрани закон и повеления и буди любомилостив и праведен, да тебе благо будет: ¹⁰ и погреби мя добре, и матерь твою со мною, и да не ктому пребудете в ниневии: чадо, виждь, что сотвори аман ахиахару кормившему его, яко от света отведе его во тму, и елика воздаде ему: и ахиахар убо спасеся, тому же воздаяние воздадеся, и той сниде во тму: манассиа сотвори милосердие и спасеся от сети смертныя, юже потче ему: аман же паде в сеть и погибе: ¹¹ и ныне, чада, веждьте, что милостыня творит и правда избавляет. И сия глаголя, испусти душу свою на одре: бе же лет ста пятидесяти осми. И погребе его славно. ¹² И егда умре анна, погребе ю со отцем своим. Отиде же товиа с женою своею и с сынми своими во екватаны ко рагуилу тестю своему, ¹³ и состареся честно, и погребе тестев своих славно, и наследи имение их и товита отца своего: ¹⁴ и умре (сый) лет ста двадесяти седми во екватанех мидийских: ¹⁵ и слыша, прежде неже умрети ему, погубление ниневии, юже плени навуходоносор и асуир: и возрадовася, прежде неже умре, о ниневии.