¹ И рече рафаил ко товии: не веси ли, брате, како оставил еси отца твоего? ² предтецем пред женою твоею и уготоваим дом: ³ возми же в руку желчь рыбию. И поидоста, и купно иде пес вслед их. ⁴ Анна же седяше обзирающи на пути сына своего. ⁵ И усмотри его грядуща и рече отцу его: се, сын мой грядет и человек пошедый с ним. ⁶ А рафаил рече: вем аз, товие, яко отверзет очи отец твой: ⁷ ты убо помажи желчию на очесех его, и угрызен отрет, и отверзет бельма, и узрит тя. ⁸ И притекши анна нападе на выю сына своего и рече ему: видех тя, чадо, отныне да умру. И плакастася оба. ⁹ Товит же исхождаше ко дверем и преткнуся. Сын же его притече к нему ¹⁰ и подя отца своего и посыпа желчь на очеса отца своего, глаголя: дерзай, отче. ¹¹ Егда же огрызена быша, отре очи свои, ¹² и отртошася от углов очес его бельма, и видев сына своего, нападе на выю его ¹³ и плакася и рече: благословен еси, Боже, и благословено имя твое во веки, и благословени вси святии твои ангели, ¹⁴ яко наказал еси и помиловал еси мя: се, вижду товию сына моего. И вниде сын его радуяся, и возвести отцу своему величия бывшая ему в мидии. ¹⁵ И изыде товит во сретение невестки своея радуяся и благословя Бога, ко вратом ниневии. И чудяхуся видящии его грядуща, яко прозре. ¹⁶ И товит исповедашеся пред ними, яко помилова его Бог. И егда прнближися товит к сарре невестце своей, благослови ю, глаголя: прииди здрава, дщи: благословен Бог, иже приведе тя к нам, и отец твой и мати твоя. И бысть радость всем сущым в ниневии братиям его. ¹⁷ И прииде ахиахар, и насвас сын брата его, ¹⁸ и бысть брак товии с веселием дний седмь.