¹ И товит отец его сочисляше кийждо день: и егда исполнишася дние пути, и не прихождаху, ² рече товит: еда како посрамлени суть? или негли умре гаваил, и никтоже ему дает сребра? ³ И скорбяше зело. ⁴ Рече же ему жена его: погибе отрочищь, понеже умедли. И нача плакастися его и рече: ⁵ несть попечения мне, чадо, понеже лишихся тя света очию моею. ⁶ Товит же глаголет ей: молчи, не печалися, здрав есть. ⁷ И рече ему молчи, не прельщай мене, погибе отрочищь мой. И исхождаше на всяк день на путь вне, имже отиде: и во дни хлеба не ядяше, в нощех же не преставаше плачущися товии сына своего, донележе скончашася четыренадесять дние брака, в няже закля рагуил пребыти ему тамо. Рече же товиа рагуилу: отпусти мя, зане отец мой и мати моя не ктому надеются видети мя. ⁸ Рече же ему тесть его: пребуди у мене, и аз послю ко отцу твоему, и возвестят ему, яже о тебе. ⁹ И товиа рече: ни, но отпусти мя ко отцу моему. ¹⁰ Востав же рагуил, даде ему сарру жену его и пол имений, рабы и скоты и сребро, ¹¹ и благословив я отпусти, глаголя: да благопоспешит вам, чада, Бог небесе прежде неже умрети ми. ¹² И рече дщери своей: чти свекров твоих, тии ныне родителие твои суть, да слышу о тебе слух добр. И облобыза ю. И една рече ко товии: брате возлюбленне, да возвратит тя Господь небесе и да даст ми видети твоя чада от сарры дщере моея, да возвеселюся пред Господем: и се, вдаю тебе дщерь мою в залог, и да не опечаляеши ея. ¹³ По сих отиде товиа благословя Бога, яко благопоспеши путь его: и благословяше рагуила и едну жену его, и идяше, дондеже приближитися им к ниневии.