¹ И приидоста в дом рагуилев: сарра же срете их и радостно приветствоваше их, а она ю: и введе их в дом. ² И рече рагуил едне жене своей: коль подобен юноша товиту сыну брата моего? ³ И вопроси их рагуил: откуду есте, братия? И реста ему: от сынов неффалимлих плененных в ниневию. ⁴ И рече има: знаета ли товита брата нашего? Она же реста: знаема. И рече има: здравствует ли? ⁵ Она же реста: и жив есть и здравствует. И рече товиа: отец мой есть. ⁶ И изскочи рагуил, и облобыза его, и плакася, ⁷ и благослови его, и рече ему: добраго и благаго человека сын. И слышав, яко товит погуби очи свои, скорбен бысть и плакася: ⁸ и една жена его и сарра дщерь его плакастеся. И прияша их усердно, ⁹ и заклаша овна от овец, и предложиша снеди множайшыя. Рече же товиа рафаилу: азариа брате, рцы, о нихже глаголал еси на пути, и да совершится дело. ¹⁰ И сообщи слово рагуилу. И рече рагуил к товии: яждь, пий и благодушествуй, тебе бо достоит детище мое взяти: обаче объявлю тебе истину: ¹¹ вдавах детище мое седми мужем, и егда вхождаху к ней, умираху под нощь: но ныне благодушествуй. И рече товиа: не вкушу ничтоже зде, доидеже поставите и совещаетеся со мною. И рече рагуил: поими ю отныне по обычаю: ты бо брат еси ея, и она твоя есть, милостив же Бог да благопоспешит вама во благая. ¹² И призва сарру дщерь свою, и емь руку ея, предаде ю товии в жену и рече: се, по закону моисеову поими ю и отведи ко отцу твоему И благослови их. ¹³ И призва едну жену свою, и взем книгу, написа пнсание и запечатле. ¹⁴ И начаша ясти. ¹⁵ И призва рагуил едну жену свою и рече ей: сестро, уготови ин чертог и введи ю. ¹⁶ И сотвори, якоже рече: и введе ю тамо и плакася: и восприят слезы дщере своея и рече ей: ¹⁷ уповай, чадо, Господь небесе и земли да даст тебе радость вместо печали твоея тоя: уповай, дщи.