¹ И преста плакати. ² Она же шедша путем, приидоста в вечер ко тигру реце и пребыста тамо. ³ Отрочнщь же сниде омытися и изскочи рыба от реки и хотяше пожрети отрочища. ⁴ Ангел же рече ему: возми рыбу. И ят рыбу отрочищь и изверже ю на землю. ⁵ И рече ему ангел: разрежи рыбу, и взяв сердце и печень и желчь, положи сохранно. ⁶ И сотвори отрочищь, якоже рече ему ангел: рыбу же испекша, снедоста: и идоста оба, донелиже прилижистася ко екватаном. ⁷ И рече отрочищь ангелу: азариа брате, что есть сердце и печень и желчь рыбия? ⁸ И рече ему: сердце и печень, аще кого смущает демон или дух зол, сим подобает курити пред человеком или женою, и ктому не будет смущатсия: ⁹ желчь же, помазати человека, иже имать бельма на очесех, и изцелеет. ¹⁰ Егда же приближистася ко раге, ¹¹ рече ангел отрочищу: брате, днесь пребудем у рагуила, и он сродник твой есть, и есть ему дщерь единородна именем сарра: ¹² возглаголю о ней, еже датися тебе ей в жену, зане тебе надлежит наследие ея, и ты един еси от рода ея: отроковица же красна и умна есть: ¹³ и ныне послушай мя, и возглаголю отцу ея, и егда возвратимся от раг, сотворим брак: понеже вем рагуила, яко не даст ея мужу иному по закону моисеову, или повинен будет смерти, зане наследие тебе подобает прияти, нежели всякому человеку. ¹⁴ Тогда рече отрочищь ангелу: азариа брате, слышах аз, яко отроковица дана бе седми мужем, и вси в невестнице погибоша: ¹⁵ и ныне аз един есмь отцу и боюся, да не вшед умру якоже и прежднии, понеже демон любит ю иже не вредит ни когоже разве приходящих к ней: и ныне аз боюся да не умру и низведу живот отца моего и матере моея с печалию о мне во гроб их, и сын другий несть има, иже погребет я. ¹⁶ Рече же ему ангел: не помниши ли словес, яже заповеда тебе отец твой, о еже взяти тебе жену от рода твоего? и ныне послушай мя, брате, понеже тебе будет в жену, а о демон ни единыя мысли имей, зане в нощь сию дастся тебе она в жену: ¹⁷ и аще внидеши в невестник, возмеши жераток фимиамный, и возложиши от сердца и от печени рыбныя и покуриши: ¹⁸ и обоняет демон, и отбежит и не возвратитися во век века: егда же приидеши к ней, востаните оба и возопийте к милостивому Богу, и спасет вас и помилует: не бойся, зане тебе сия уготована есть от века, и ты ю спасеши, и пойдет с тобою, и непщую, яко тебе будут от нея чада. И яко услыша товиа сия, возлюби ю, и душа его прилепися зело ей. И приидоста во екватаны.