¹ И отвешав товиа, рече ему: отче, сотворю вся, елика заповедал еси ми: ² но како возмогу взяти сребро, а не знаю его? ³ И даде ему рукописание и рече ему: ищи себе человека, иже пойдет с тобою, и дам ему мзду, дондеже жив есмь, и шед возми сребро. ⁴ И иде искати человека, и обрете рафаила, иже бе ангел, и не ведяше: ⁵ и рече ему: могу ли пойти с тобою в раги мидииския, и известен ли еси о местех? ⁶ И рече ему ангел: пойду с тобою, и путь вем, и у гаваила брата нашего живях. ⁷ И рече ему товиа: пожди мя, и реку отцу моему. ⁸ И рече ему: иди и не косни. ⁹ И вшед рече отцу: се, обретох, иже пойдет со мною сей же рече: пригласи его ко мне, да увем, коего племене есть, и аще верен есть, еже ити с тобою. ¹⁰ И призва его: и вниде, и приветствоваста друг друга. ¹¹ И рече ему товит: брате, от коего племене и от коего отечества еси ты? скажи ми. ¹² И рече ему: племене и отечества ты ищеши? или наемника, иже спутьшествует с сыном твоим? И рече ему товит: хощу брате, ведати род твой и имя. ¹³ Он же рече: аз азариа анании великаго от братии твоея. ¹⁴ И рече ему: благо пришел еси, брате, и на мя да не гневаешися, яко взысках племя твое и отечество твое уведати, и ты еси брат мой от добра и блага рода: знах бо аз ананию и ионафана сынов семеа великаго, яко ходихом купно во Иерусалим кланятися, прносяще первородная и десятины плодов, и не заблудиша в заблуждении братии нашея: от корене великаго еси, брате: ¹⁵ но рцы мне, кую тебе имам мзду дати? драхму на день и нуждная тебе якоже и сынови моему: ¹⁶ и еще приложу тебе над мзду, аще здрави возвратитеся. ¹⁷ И благоизволиста тако. И рече к товии: готов вуди к пути, и да благоспешится вама. И уготова сын его, яже к пути. И рече ему отец его: иди с человеком сим: обитаяй же на небеси Бог благоустроит путь ваш, и ангел его да спутьшествует вама. И изыдоста оба отити, и пес отрочища с нима. ¹⁸ Плакася же анна мати его и рече к товиту: почто отпустил еси чадо наше? или не жезл руки нашея есть, внегда входите ему и исходити пред нама? ¹⁹ сребро сребром да не возвратится, но уметы сына нашего да будет: ²⁰ яко бо дадеся нама жити от Господа, сие доволно есть нама. ²¹ И рече ей товит: не печалися, сестро, здрав приидет, и очи твои узрят его: ²² ангел бо благ спутьшествовати будет ему и благоуспеется путь его, и возвратится здрав.