¹ Тогда сисинний епарх килисирийский и финикийский, и сафравузан, и друзие, последующе от дариа царя повелением, ² настояху священным делом, прилежнее содействующе старейшинам иудеев и священноначалником: ³ и благопоспешна бяху священная дела, прорицающым аггею и захарии пророком. ⁴ И совершиша сия по заповеди Господа Бога израилева и с повелением кира и дариа и артаксеркса царей персских: ⁵ и совершен бысть дом святый даже до третияго и двадесятаго дне месяца адара, шестаго лета дариа царя. ⁶ И сотвориша сынове израилевы и священницы и левити и прочии, иже бяху от пленения, приставленнии, по написанным в книзе моисеове, ⁷ и принесоша во обновление святилища Господня юнцев сто овнов двести, агнцев четыре ста, ⁸ козлов за грехи всего израиля дванадесять по числу, от племеноначалников израилевых дванадесяти. ⁹ И сташа священницы и левити по племеном одеяни в ризы, над делы Господа Бога израилева, по книзе моисеове, и вратари над киимиждо дверми, ¹⁰ И содеяша сынове израилевы с сущими от пленения пасху в четвертыйнадесять день перваго месяца, егда освятишася священницы и левити. ¹¹ Вси же сынове пленения не вкупе очистишася, понеже левити вси вкупе очистишася ¹² и пожроша пасху всем сыновом пленения и братиям их священником и себе сами. ¹³ И ядоша сынове израилевы, иже от пленения, вси отлучившиися от мерзостей языков земли, ищуще Господа, ¹⁴ и праздноваша праздник опресноков седмь дний, веселящеся пред Господем, ¹⁵ понеже обрати совет царя ассирийскаго к ним, еже укрепити руки их на дела Господа Бога израилева.