¹ И сии князие отечеств их вождеве, иже взыдоша со мною в царство артаксеркса царя вавилонска: ² от сынов финеесовых гирсон, от сынов ифамарих даниил, от сынов давидовых аттус, ³ от сынов саханииных, от сынов форосовых захариа, и с ним мужей сто пятьдесят, ⁴ от сынов фааф-моава елиана сын сараиев, и с ним двести мужей, ⁵ и от сынов зафоисовых ехениа сын азиилев, и с ним триста мужей, ⁶ и от сынов адиных овин сын ионафанов, и с ним пятьдесят мужей, ⁷ и от сынов едамлих исаиа сын афелиин, и с ним седмьдесят мужей, ⁸ и от сынов сафатиевых завдиа сын михаилов, и с ним осмьдесят мужей, ⁹ и от сынов иоавлих авдиа сын иеиилев и с ним двести осмьнадесять мужей, ¹⁰ и от сынов вааниевых селимуф сын иосефиев, и с ним сто шестьдесят мужей, ¹¹ и от сынов вавиевых захариа сын вавиев, и с ним двадесять осмь мужей, ¹² и от сынов азгадовых ионан сын икатанов, и с ним сто десять мужей, ¹³ и от сынов адоникамлих последнии, и сия имена их: едифалаф, иеиил и самаиа, и с ним шестьдесят мужей, ¹⁴ и от сынов вагуаевых уфай и завуд, и с ними седмьдесят мужей. ¹⁵ Собрах же их к реце текущей ко евии, и пребыхом ту три дни: исках же в людех и во священницех, и от сынов левииных не обретох тамо. ¹⁶ И послах ко елеазару, ариилу, семеию и к маонану, и иериву и елнафаму, и нафану и захарии и месолламу, и ко иоариму и елнафану, премудрых, ¹⁷ и изведох их ко адаю началнику на месте касфиа и вложих во уста их словеса глаголати ко адаю и братии его афинимом на месте касфии, привести нам поющих в дом Бога нашего. ¹⁸ И приидоша к нам, понеже рука Бога нашего бе блага на нас, муж сахон от сынов моолиевых сына левиина, сына израилева, и саравиа, и сынове его и братия его осмьнадесять: ¹⁹ и асевиа, и исаиа от сынов мерариных и братия его и сынове его двадесять: ²⁰ и от нафинимов, ихже даде давид и князие ко службе левитом, нафинимов двести двадесять, вси собрашася по именом. ²¹ И проповедах тамо пост близ реки ауи, еже смиритися пред Господем Богом нашим, просити от него пути праваго нам и чадом нашым и всему стяжанию нашему: ²² устыдехся бо испросити от царя силы и конник защитити нас от врага на пути, понеже рехом царю глаголюще: рука Бога нашего есть на всех ищущих его во благое и крепость его, ярость же его на всех оставляющих его. ²³ Постихомся же и молихомся Богу нашему о сем, и услыша нас. ²⁴ И отлучих от князей священнических дванадесять, сараию, асавию и с ними от братии их десять: ²⁵ возвеснх же им сребро и злато и сосуды начатков дому Бога нашего, яже вознесе царь и советницы его и князие его, и весь израиль обретаяйся, ²⁶ и дах весом в руки их сребра талантов шесть сот пятьдесят, и сосудов сребряных сто, и злата сто талант, ²⁷ и чаш златых двадесять, драхм тысящу, и сосуды меди светлыя добрыя различныя, драгоценныя яко злато, ²⁸ и рекох им: вы святи Господу Богу, и сосуди святи и сребро и злато, еже волею вдано есть Господу Богу отец наших: ²⁹ бдите и стрегите, дондеже весом отдадите пред князи священников и левитов и пред князи отечеств израилевых во Иерусалиме, во скиниих дому Господня. ³⁰ И прияша священницы и левити вес сребра и злата и сосудов, да вознесут во Иерусалим в дом Бога нашего. ³¹ И воздвигохомся от реки ауи во вторыйнадесять день месяца перваго, да идем во Иерусалим: и рука Бога нашего бе на нас и избави нас от рук вражиих и ратников на пути, ³² и приидохом во Иерусалим и пребыхом ту три дни. ³³ И бысть в день четвертый, отдахом весом сребро и злато и сосуды в дому Бога нашего под руку маримофа сына урии священника, и с ним елеазар сын финеесов, и с ними иозавад сын иисусов и ноадиа сын ванаиев левити, ³⁴ по числу и весу вся: и написан бысть весь вес. ³⁵ Во время то, иже приидоша от пленения сынове преселения, принесоша всесожжения Богу израилеву, телцев дванадесять за всего израиля, овнов девятьдесят шесть, агнцев седмьдесят седмь, козлов за грехи дванадесять, вся во всесожжение Господу. ³⁶ И даша повеление царево правителем царским и князем, иже за рекою: и прославиша людий и дом Божий.