¹ И услышаша врази иудины и вениамини, яко сынове преселения созидают церковь Господу Богу израилеву, ² и приступиша к зоровавелю и ко князем отечеств и рекоша им: созиждем с вами, понеже, якоже и вы, ищем Бога вашего и ему мы жрем жертву от дний асарадана царя ассурска приведшаго ны семо. ³ И рече им зоровавель и иисус и прочии князи отечеств израилевых: несть нам и вам создати дом Богу нашему, понеже мы сами особно созиждем Господу Богу нашему, якоже повеле нам кир царь персский. ⁴ И быша людие земли (тоя) ослабляюще руки людий иудейских, и препинаху им в созидании, ⁵ и наимаху на них советников, да разорят совет их, во вся дни кира царя персскаго и даже до царства дариа царя персскаго. ⁶ В царство же ассуира, (иже есть артаксеркс,) в начале царства его, написаша свиток на живущих во иудеи и во Иерусалиме. ⁷ И во дни арфасафана написа в мире мифридат и тавеил со прочими сослужители ко артаксерксу царю персскому: написа писмоносец писание сирским языком и претолковано. ⁸ Реум валтаам и сампса книгочий написаста послание едино на Иерусалим ко артаксерксу царю: ⁹ тако судил реум валтаам и сампса книгочий и прочии сослужителие наши, динее, афарсафахее, тарфалее, арфасее, архиее, вавилоняне, сусанахее, савее, еламите ¹⁰ и прочии от язык, ихже преведе ассенафар великий и преславный и всели их во градех самарийских и прочих об он пол реки. ¹¹ Сие есть сказание послания, еже послаша к нему, ко артаксерксу царю: раби твои, мужие, иже за рекою: ¹² ведомо да будет царю, яко иудее, иже взыдоша от тебе к нам, приидоша во Иерусалим град отступный и лукавый, егоже созидают: и стены его состроены суть, и основание его возвысиша: ¹³ ныне убо ведомо да будет царю, яко, аще град сей создан будет, и стены его совершатся, дани не будут тебе, ниже (летняго воздаяния) дадут: и сие царем зло творит, ¹⁴ и посрамощения царева не леть нам видети: сего ради послахом и возвестихом царю, ¹⁵ да разсмотрено будет в книзе памятописней отцев твоих, и обрящеши в книзе памятописней и познаеши, яко град он отступный есть и обидящь царей и страны, и убежища слуг бывают посреде его от дний древних, сего ради и град той опустошен есть: ¹⁶ ведомо убо творим царю, яко, аще град той создан будет и стены его совершатся, то не будет ти мира. ¹⁷ И посла царь ко реуму валтааму и сампсаю книгочию и ко прочым сослужителем их обитающым в самарии и прочым за рекою мир ¹⁸ и рече: писмоносец, егоже посласте к нам, призван пред мене, ¹⁹ и от мене повелено есть, и соглядахом и обретохом, яко град той от дний древних на царей возносится, отступления и убежища бывают в нем: ²⁰ и царие крепцы быша во Иерусалиме и обладаху всею страною, яже за рекою, дани же многи и часть давашеся им: ²¹ и ныне повелите мужем оным престати от дела, и град оный да не созидается ктому: ²² яко да от повеления сего опасни будете нерадение творити о сем, да не когда умножится погибель на зло царем. ²³ Тогда писмоносец артаксеркса царя прочте свиток пред реумом валтаамом и сампсаем книгочием и сослужителми их: и идоша тщателно во Иерусалим и во иудею, и удержаша их мышцею сильною. ²⁴ Тогда преста дело дому Божия, еже во Иерусалиме, и не творяшеся даже до лета втораго царства дариа царя персскаго.