¹ Пришедшу же месяцу седмому, и бяху сынове израилевы во градех своих, и собрашася людие аки человек един во Иерусалим. ² И воста иисус сын иоседеков и братия его священницы, и зоровавель сын салафиилев и братия его, и создаша олтарь Богу израилеву, да принесут на нем всесожжения, якоже писано есть в законе моисеа человека Божия. ³ И уготоваша олтарь на основании его, понеже страх бе на них от людий земных, и вознесоша на том всесожжение Господеви утро и в вечер: ⁴ и сотвориша праздник кущей, якоже писано, и всесожжения на всяк день числом по повелению, дело дне в день свой: ⁵ и посем всесожжения непрестанная и в новомесячия и во вся праздники Господеви освященныя, и о всяцем добровольно приносящем со усердием Господеви. ⁶ От перваго дне месяца седмаго начаша возносити всесожжения Господеви, дом же Господень не бе еще основан. ⁷ И вдаша пенязи каменосечцем и древоделем, пищу же и питие и елей сидоняном и тиряном, да принесут древа кедрова от ливана к морю иоппийскому, якоже соизволи кир царь персский о них. ⁸ И в лето второе, внегда приити им к дому Божию во Иерусалим, месяца втораго нача зоровавель сын салафиилев и иисус сын иоседеков, и прочии от братии их священницы и левити, и вси, иже приидоша от пленения во Иерусалим, и поставиша левитов от двадесяти лет и вышше над творящими дела во храме Господни. ⁹ И ста иисус и сынове его и братия его, кадоил и сынове его, сынове иудины, якоже муж един да единодушно настоят над творящими дела в дому Божии, сынове инададовы, сынове их и братия их левити. ¹⁰ И основаша созидающе дом Господень: и сташа священницы во украшении своем со трубами, и левити сынове асафовы, в кимвалех да хвалят Господа, по уставу давида царя израилева: ¹¹ и вопияху в песнех и исповедании Господеви, яко благ, яко в век милость его над израилем: и вси людие возглашаху гласом великим хваление Господу при основании дому Господня. ¹² И мнози от священников и левит, и князи отечеств и старейшины, иже видеша дом преждний на основании своем, и сей дом пред очесы своими, плакаху гласом велиим: и народ возглашающь, в веселии возвышаху: ¹³ и не можаху людие познати гласа восклицания веселящихся от гласов плача народнаго, понеже людие восклицаху гласом великим, и глас велик слышашеся издалеча.