¹ Дванадесяти лет бе манассиа, егда царствовати нача, и пятьдесят пять лет царствова во Иерусалиме: ² сотвори же лукавое пред Господем по всем мерзостем языческим, ихже истреби Господь от лица сынов израилевых: ³ и возврати и созда высокая, яже раскопа езекиа отец его, и сострои кумиры ваалиму, и сотвори дубравы, и поклонися всему воинству небесному, и послужи им, ⁴ и созда олтари в дому Господни, о немже глагола Господь: во Иерусалиме будет имя мое во веки: ⁵ созда же жертвенники всему воинству небесному во двою дворех дому Господня. ⁶ Той же проведе чада своя чрез огнь во удоли веенномли и вражаше (со жребии), и последоваше гаданием, и волхвованием служаше, и имеяше чревоволшебники и обаянники, и многа лукавая сотвори пред Господем, да прогневает его: ⁷ истуканы же и слиянны образы сотвори и постави в дому Божии, о немже глагола Бог к давиду и к соломону сыну его: в дому сем и во Иерусалиме, егоже избрах от всех колен израилевых, положу имя мое во век, ⁸ и не приложу подвигнути ногу израилеву от земли, юже предах отцем их, токмо аще сохранят сотворити вся, яже повелех им, по всему закону и повелением и судбам, рукою моисеовою. ⁹ И прельсти манассиа иуду и живущих во Иерусалиме, да сотворят лукавое паче всех язык, ихже испроверже Господь от лица сынов израилевых. ¹⁰ И глагола Господь к манассии и к людем его, и не послушаша. ¹¹ И наведе Господь на них началники воев царя ассирийска, и яша манассию во узах, и связаша его оковы ножными, и отведоша в вавилон. ¹² И егда озлоблен бысть, взыска лице Господа Бога своего, и смирися зело пред лицем Бога отец своих, ¹³ и помолися к нему и послуша его, и услыша вопль его, и возврати его во Иерусалим на царство его: и позна манассиа, яко Господь той есть Бог. ¹⁴ И по сих созда стену вне града давидова от ливы к югу в потоце и ко входу врат рыбных, исходящым вратами сущими окрест в высоту, и возвыси зело: и постави началники воем во всех градех иудиных стенатых, ¹⁵ и отят боги чуждыя и идолы от дому Господня, и вся олтари, яже созда в горе дому Господня и во Иерусалиме, и изверже вся вон из града. ¹⁶ И паки воздвиже олтарь Господень, и пожре на том жертву спасения и хваления, и заповеда иуде, да служат Господу Богу израилеву. ¹⁷ Но еще людие жряху на высоких, обаче Господу Богу своему. ¹⁸ Прочая же словес манассииных, и молитва его, яже к Богу, и словеса провидящих, иже глаголаху к нему во имя Господа Бога израилева, ¹⁹ се, во словесех молитвы его, и яко услыша его, и вси греси его и отступления его, и места, на нихже созида высокая, и сотвори тамо дубравы и изваянная, прежде неже обратитися ему, се, писана суть во словесех провидящих. ²⁰ Успе же манассиа со отцы своими, и погребоша его в саду дому его. И воцарися вместо его сын его амон. ²¹ Двадесяти дву лет бе амон, егда царствовати нача, и два лета царствова во Иерусалиме, ²² и сотвори лукавое пред Господем, якоже творяше манассиа отец его, и всем идолом, ихже сотвори манассиа отец его, пожре амон и послужи им: ²³ и не смирися пред Господем, якоже смирися манассиа отец его, зане сын его амон умножи грехи. ²⁴ И нападоша нань раби его и убиша его в дому его. ²⁵ И убиша людие земли нападших на царя амона, и поставиша людие земли царя иосию сына его вместо его.